Te mea i New York ta ˈna e mihi ra

MAI te mau matahiti 1950 mai â, ua faaite-maitai-hia te papai i nia nei i nia i te hoê o te mau fare neneiraa a te Taiete Watchtower i Brooklyn, i New York. E faahaamanaˈohia i te feia o te haere i te ohipa, te mau ratere, e vetahi atu â e haere ra na reira ia taio i te Bibilia i te mau mahana atoa. Te faaite ra te rata i muri nei a te hoê potii Ite i te aravihi mau o teie faahaamanaˈoraa.

“Te faaite ra vau i to ˈu hoa haapiiraa eaha ta ˈu e hinaaro e rave ia faarue au i te haapiiraa tuarua. Ua haamata vau i te paraparau no nia i te Betela, te pu rahi a te mau Ite no Iehova, e ua anaanatae roa mai oia. Ua faaite mai oia ia ˈu e ua paari oia i te oire no New York. E ere i te hoê utuafare faaroo roa to ˈna, i te mau poipoi atoa râ, ia hiˈo oia na te haamaramarama, te vai ra te hoê papai o te na ô ra e: ‘A taio i te Parau a te Atua te Bibilia Moˈa i te mau mahana atoa.’ No reira oia e taio ai i ta ˈna Bibilia i te mau mahana atoa hou oia e haere ai i te fare haapiiraa.

“I muri aˈe i to ˈna faarueraa i te oire, ua parau mai oia e te mea i New York ta ˈna e mihi ra, oia ïa ia ara mai oia, aita oia e ite faahou ra i te faahaamanaˈoraa e taio i te Bibilia. Maoti râ te papai i nia i te fare a te Watchtower i matau ai oia i te taio i te Bibilia, no reira, te tamau nei oia i te taio i te Bibilia i te mau mahana atoa!”

Eaha te hoê ravea maitai aˈe no te haamata i te mahana i te taioraa i te hoê tuhaa o te Parau a te Atua! A na reira ˈi outou, e au iho â outou i te mau parau a te aposetolo Paulo o te na ô ra: “Te parau moˈa i papaihia ra, o te parau . . . e paari ai oe e tae noa ˈtu i te ora i te faaroo i te Mesia ra ia Iesu.”—Timoteo 2, 3:15-17.