Te taata—E animala hau rii aˈe anei?

“E tiaturiraa taa ê anei to tatou no nia i te parau nohea mai te ora?”

Teie te uiraa i uihia e te hoê potii 16 matahiti i Beresilia ei omuaraa i ta ˈna tumu parau “Te taata—E animala hau rii aˈe anei?” Ua titau maninihi mai ta ˈna orometua haapii ia tauaparau oia i teie uiraa i te piha haapiiraa, i muri aˈe i to te orometua haapii raveraa i te A ara mai na! o te 22 no Tiunu 1998 (Farani) no nia i taua tumu parau ra.

Ua haapapu noa te taurearea Ite i te peapea mau o te haapiiraa o te tauiuiraa o te mau mea ora i niuhia i nia i te maitiraa natura. Ei hiˈoraa, te manaˈo ra e rave rahi taata e ua aratai te haapiiraa tumu ore e e tauiui noa te mau mea ora i te tahi ia hiˈo i te tamaˈi mai te hoê noa tuhaa o te aroraa mure ore no te ora mai, no te faaohie i te tupuraa o te Fascisme e te Nazisme.

Ua faaite te tamahine haapii e e taa-ê-raa rahi tei rotopu i te mau taata e te mau animala. Teie ta ˈna i parau: “O te taata anaˈe te nehenehe e faaohipa i te huru pae varua. O te taata anaˈe te tamata i te ite i te auraa e te tumu o te oraraa. O te taata anaˈe ta te pohe e faahoruhoru, te tapitapi e nohea mai ratou, e te hinaaro e ora e a muri noa ˈtu. E faufaa mau â ia horoa tatou i te taime no te ite hau rii aˈe nohea mai tatou!”

Ua haapopou te orometua haapii i te tumu parau maitai. Ua faaite oia e ua manuïa te reira no te mea mea au roa na teie taurearea Ite e taio. Ua matauhia te potii i te fare haapiiraa mai te hoê taata taio rahi roa i te mau papai niuhia i nia i te Bibilia mai te A ara mai na! e Te Pare Tiairaa.

Te tapitapi mau ra te mau Ite no Iehova i te faahopearaa ta te haapiiraa tumu ore e e tauiui noa te mau mea ora e faatupu ra i roto i te mafatu e te feruriraa o te mau taurearea. No te reira tumu i faaitoito ai te amuiraa a teie potii i te mau taurearea Ite ia horoa i te A ara mai na! o te 22 no Tiunu 1998 i ta ratou mau orometua haapii e hoa haapiiraa. E fatata e 230 vea tei operehia i te mau fare haapiiraa e rave rau o te oire. Ua tamatahiti te faatere o te Tuhaa no te pae Ihi o te hoê fare haapiiraa i te vea A ara mai na!

Oia, e tiaturiraa taa ê to tatou no nia i te parau nohea mai te ora! Ua faaite teie tamahine apî e to ˈna mau hoa e, o te tiaturiraa i te Atua poiete te taa-ê-raa mau i roto i to ratou oraraa.