Nafea Iehova e haamanaˈo ai ia outou?
“E HAAMANAˈO mai oe ia ˈu, e tau Atua.” E rave rahi mau taime to Nehemia taparuraa i te Atua na roto i taua mau parau ra. (Nehemia 5:19; 13:14, 31) E ere roa ˈtu ïa i te mea maere ia fariu atu te taata i nia i te Atua ma te mau faahitiraa taparuraa mai teie ia fifihia ratou.
Eaha râ to roto i te feruriraa o te taata a ani ai ratou i te Atua ia haamanaˈo mai ia ratou? Papu maitai, te tiaturi ra ratou ia rave te Atua hau atu â i te haamanaˈo-noa-raa i to ratou iˈoa. Aita e feaaraa e hoê â to ratou tiaturiraa e to te hoê o na taata ohipa iino tei haapohehia i pihai iho ia Iesu. Ua taparu oia, tei taa ê atu i te tahi, ia Iesu ma te parau e: “E haamanaˈo mai oe ia ˈu ia tae oe i to oe ra basileia.” Aita oia i hinaaro ia haamanaˈo noa o vai o ˈna, ia rave atoa râ i te tahi ohipa no ˈna—oia hoi ia faatia faahou mai ia ˈna.—Luka 23:42.
E faaite pinepine te Bibilia e no te Atua, te “haamanaˈoraa,” oia ïa te raveraa i te hoê ohipa maitai. Ei hiˈoraa, 150 mahana i muri aˈe i to te fenua îraa i te diluvi, ‘ua haamanaˈo te Atua ia Noa e ua faafarara ihora te Atua i te hoê mataˈi na nia i te fenua ia pahee taua moana ra.’ (Genese 8:1) E mau senekele i muri iho, teie te pure ta Samasona, tei haamatapohia e taamuhia i te fǐfǐ e te mau Philiseti, i faahiti: “E Iehova, e haamanaˈo mai oe ia ˈu, o ta ˈu ïa pure ia oe i teie nei, e faaetaeta mai oe ia ˈu nei, hoê roa ra faaetaetaraa toe o teie anaˈe nei.” Haamanaˈo aˈera Iehova ia Samasona ma te horoa i te puai hau aˈe i to te taata ia nehenehe oia e tahoo ia ˈna iho i nia i te mau enemi o te Atua. (Te mau tavana 16:28-30) No Nehemia, ua haamaitai Iehova i ta ˈna mau tutavaraa, e ua haapapu-faahou-hia te haamoriraa mau i Ierusalema.
Teie ta te aposetolo Paulo i papai: “Te mau parau atoa hoi i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” (Roma 15:4) Mai te peu e e haamanaˈo tatou ia Iehova ma te imi i te rave i to ˈna hinaaro, mai tei ravehia e ta ˈna mau tavini haapao maitai i tahito ra, papu maitai e e haamanaˈo mai Iehova ia tatou ma te tauturu e ia noaa ta tatou mau mea e hinaaro i te mau mahana atoa, ma te turu ia tatou i roto i to tatou mau ati, e ma te faaora ia tatou ia hopoi oia i ta ˈna haavaraa i nia i te feia paieti ore.—Mataio 6:33; Petero 2, 2:9.