Te hoê matahiti opereraa Bibilia faahiahia roa

MEA rahi roa ˈtu â te taata e Bibilia ta ratou i teie mahana i to mutaa iho. O ta te hoê ïa parau faataa a te mau Taiete Bibilia Amui e faaite ra, no te mea ua hau aˈe te opereraa Bibilia i te afa mirioni i te matahiti 1998 i to te matahiti na mua ˈtu. E hau atu i te 57 200 000 rahiraa Bibilia—te taatoaraa aore ra te hoê tuhaa—tei operehia e ati aˈe te ao nei. Te na ô ra te parau faataa e: “E tumu te reira no te faaitoito.” “I teie mahana, te faaitehia ra te Parau a te Atua i te taata e rave rahi.”

Parau mau, te vai ra te hoê taa-ê-raa i rotopu i te fanaˈoraa i te hoê Bibilia e te taioraa i te reira. Ei hiˈoraa, ua faaite te hoê titorotororaa e e hau atu i te 90 % aˈe o te mau Marite e Bibilia ta ratou, e te tiaturi ra hoê â rahiraa taata i te Bibilia mai te hoê pû maitai no te haapiiraa i te pae morare. Tera râ, e 59 % anaˈe o tei parau e te fariu nei ratou i nia i te Bibilia ia noaa te mau aˈoraa. E e 29 % o tei faˈi e “aita” ratou i matau “roa” i te Bibilia aore ra “aita roa ˈtu.”

Taa ê atu i te neneiraa e te opereraa i te mau Bibilia, e faatere atoa te mau Ite no Iehova i te mau haapiiraa Bibilia tamoni ore i te fare o te taata i roto hau atu i te 230 fenua. I teie nei, te fanaˈo ra e mau mirioni na te ao nei i teie porotarama haapiiraa Bibilia. Te tauturuhia ra ratou ia faaruru i te mau fifi ta ratou e farerei ra i teie nei, e te haapii ra ratou i ta te Bibilia e parau ra no nia i te hoê oraraa faahiahia no a muri aˈe i raro aˈe i te Basileia o te Atua.—Isaia 48:17, 18; Mataio 6:9, 10.

[Hohoˈa i te api 32]

Te mau haapiiraa Bibilia i te fare o te taata i (ma te faaohu mai nia mai i te pae aui) Bolivie, Ghana, Sri Lanka, e i Beretane