Te faatia ra te feia poro i te Basileia

Te maraaraa teotaratia i Namibie

UA TAE te parau apî maitai o te Basileia o te Atua no te taime matamua i Namibie i te hopea o te mau matahiti 1920. Mai taua taime ra, ua farii e mau hanere feia mafatu tia i te poroi faaoraraa a te Atua. Te faaite ra te mau aamu i muri nei nafea Iehova e haaputuputu ai i tei hinaarohia i roto i to ˈna aua.—Hagai 2:7.

◻ Ua farerei te mau Ite no Iehova no te taime matamua ia Paulus, te hoê taata e ora noa i te faaapu e e noho ra i Namibie apatoerau hitia o te râ, i to ˈna haereraa i Windhoek, te oire pu. Ua tiaturi oioi o Paulus e ua itea mai ia ˈna te parau mau. Ua hoˈi oia i te fare e te buka ra E nehenehe oe e ora e a muri noa ˈtu i roto i te paradaiso i nia i te fenua nei. I muri iho, i to ˈna revaraa i Rundu, te oire fatata roa ˈˈe tei reira te hoê Piha no te Basileia, ua itea mai ia Paulus te mau Ite e ua taparu oia ia ratou ia haere mai e farerei ia ˈna.

Teie râ, mea atea roa no te mau Ite ia haere mai e faatere i te hoê haapiiraa Bibilia tahebedoma e o Paulus. Ma te ore roa e haaparuparu, ua haamata Paulus i te haapii i te Bibilia o ˈna anaˈe. Hau atu â, ua poro oia ma te itoito ia vetahi ê i te mea ta ˈna e haapii ra. A muri aˈe, ua haamauhia te hoê pǔpǔ haapiiraa Bibilia. I to te pǔpǔ iti faarooraa na roto i te radio e e tupu te hoê tairururaa a te mau Ite no Iehova i Rundu, ua amui ratou i ta ratou mau faufaa haihai roa e ua faanaho ihora ratou i te faurao no te haere.

Auê ïa huru tupuraa faahiahia mau no ratou te apitiraa i te mau Ite no Iehova no te taime matamua! Ua rave-oioi-hia te mau faanahoraa e ia haere tamau te mau taeae aravihi e farerei i taua pǔpǔ ra. I teie nei mahana, te vai ra e ono taata poro i te oire iti e faaeahia e Paulus.

◻ Ua tupu to Johanna anaanatae i te iˈoa o te Atua i to ˈna faarooraa i te hoê taata e faaino ra i te mau Ite no Iehova. Te haamanaˈo ra oia e: “I te taime matamua iho â to ˈu faarooraa i te iˈoa ra Iehova, ua mau roa ïa te reira i roto i to ˈu feruriraa, e ua haamata aˈera vau i te uiui o vai o Iehova. Te noho ra vau e ta ˈu tane i pihai iho i te Ooa no Walvis i te pae miti o Namibie. I te hoê taime ua haere mâua i te oire, e ua ite au vetahi mau Ite e opere ra i te vea ra Te Pare Tiairaa i roto i te aroâ. Ua noaa mai ia ˈu hoê e ua ani au i te hoê haapiiraa Bibilia, no te mea e rave rahi mau uiraa ta ˈu. Ua taˈi au i to ratou faaararaa mai ia ˈu e eita ratou e tae mai no te mea ua ino to ratou pereoo. Aita i maoro i muri aˈe, ua pohe ta ˈu tane, e ua haere au e faaea i te oire no Keetmanshoop. Ua tonohia te hoê pionie taa ê (te hoê taata poro evanelia ma te taime taatoa) no te ohipa i ǒ, e ua noaa mai ia ˈu te buka ra Te parau mau e aratai i te ora mure ore ra na roto ia ˈna. I te omuaraa iho â, ua taa ia ˈu te taˈi o te parau mau.

“I te pae hopea, ua titauhia mai au e apiti atu i roto i te ohipa pororaa, ua pohe râ vau i te mǎtaˈu i te taata. A haere noa ˈi au i tera e tera fare, ua pure au ia Iehova e vaiiho ia ˈu ia pohe, eiaha râ ia poro. I to ˈu haere-matamua-raa e poro na te aroâ, ua tapuni au i roto i te hoê aroâ ǒaǒa, ma te tiaturi e aore e taata e ite mai ia ˈu. I te pae hopea, ua faaitoito au i te pûpû i te hoê vea i te hoê taata e haere ra na reira, e i taua taime noa ra to ˈu neheneheraa e parau i te hoê parau. I taua mahana ra, maoti te turu a Iehova, ua tufa vau i to ˈu tiaturiraa niuhia i nia i te Bibilia e e rave rahi taata.

“I teie nei mahana, 12 matahiti i muri aˈe, noa ˈtu te veve i te pae materia, te poihere noa nei â vau i te haamaitairaa o te taviniraa pionie e te tamau nei au i te oaoa roa ino i te tufaraa i te parau mau o te Basileia e o vetahi ê.”