Te paari no te ‘ite eaha te tupu mai’
“E NUNAA teie tei erehia i to ratou feruriraa maitai e o te ore e maramarama ra. Ahiri e e paari to ratou, e maramarama ïa ratou i te reira e e ite ratou eaha te tupu mai i nia ia ratou.”—Deuteronomi 32:28, 29, Beck.
Na Mose i parau i teie mau parau i te mau Iseraela a tia ˈi ratou i te otia o te Fenua Tǎpǔhia. Te tohu ra Mose i te hoê tau i reira ratou e faarue ai ia Iehova e e ore ai ratou e tâuˈa i te mau faahopearaa o ta ratou mau ohipa. I te roaraa o te mau senekele i muri iho, aita te nunaa no Iseraela—e e rave rahi atoa mau arii—i haapao i te mau faaararaa a te Atua.
Ei hiˈoraa, ua ite o Solomona i te faaueraa a te Atua eiaha e faaipoipo e te feia e haamori ra i te mau atua ê atu ia Iehova. (Deuteronomi 7:1-4) Noa ˈtu te reira, ua faaipoipo o ˈna e e “te vahine ěê e rave rahi.” Eaha te faahopearaa? Te na ô ra te Bibilia e: “Paari aˈera hoi Solomona, faafariu-ê-hia ihora tana aau e te mau vahine na ˈna, a pee atu ai i te mau atua ěê; aita aˈera tana aau i au i to ˈna Atua ia Iehova, mai te aau o to ˈna metua ra o Davida.” (Te mau arii 1, 11:1, 4) Noa ˈtu e e taata paari oia, ua erehia o Solomona i te feruriraa maitai no ‘te ite eaha te tupu mai’ ia ore o ˈna e haapao i te faaueraa a te Atua.
E o tatou? E nehenehe tatou e ape e rave rahi mau mauiui mai te peu e e haapao maitai tatou i te mau faaotiraa o te oraraa. Ei hiˈoraa, te aˈohia ra te mau Kerisetiano ia ‘tamâ hua ratou ia ratou iho i te mau viivii atoa o te tino e te varua.’ (Korinetia 2, 7:1) E haerea paari mau te reira, aita râ to te rahiraa e feruriraa maitai no te ite eaha te tupu mai ia ore ratou e haafaufaa i te aˈoraa a Paulo. Ei hiˈoraa, e rave rahi mau taurearea o te haaviivii nei i to ratou mau tino ma te puhipuhi i te avaava, ma te manaˈo e e hiˈohia ratou mai te tahi mau taata faahiahia e mai te taata paari. Auê râ te peapea e ei faahopearaa, ia maoro anaˈe i roto i te oraraa, e rave rahi i rotopu ia ratou o te faaruru atu i te mau maˈi mafatu, te mariri ai taata o te mahaha, aore ra te oruraa o te mahaha!
Mea faufaa roa ia haapao maitai i te mau faahopearaa o ta tatou mau faaotiraa e mau ohipa. Ua tano iho â o Paulo i te papairaa e: “O ta te taata e ueue ra, o ta ˈna â ïa e ooti mai. O te ueue i ta to ˈna ihora tino, o te pohe ta ˈna e noaa i te tino ra; e o te ueue i ta te [v]arua ra, o te ora mure ore ta ˈna e noaa i te [v]arua ra.”—Galatia 6:7, 8.