Te arue nei te feia mana i te mau Ite

I CÁDIZ, i te fenua Paniora, te hoê oire tapaeraa pahi tau 500 kilometera i te pae apatoa tooa o te râ no Madrid, ua faaite te tavana oire ra o Doña Teófila Martínez i te hoê iri auri (faahohoˈahia i nia nei) i te mau Ite no Iehova. E taiohia e: “Te fare oire no Cádiz i te mau Ite no Iehova no te haamauruuru i ta ratou tururaa e ta ratou mau tutavaraa no te maitai o teie oire.” Eaha ta te mau Ite i rave no te fanaˈo i teie faahanahanaraa?

Ua horoahia te reira ei haamauruururaa no te ohipa ta te mau Ite i rave no te faaapî i te tahi tuhaa o te tahua tuaro o te oire. I roto e rave rahi mau hopea hebedoma, e mau hanere Ite tei haere mai e tauturu no te hamani faahou i te tahua o te mau vahi haumitiraa o te vahi tueraa popo no Carranza. I teie nei, e fanaˈo te feia atoa e faaohipa ra i te tahua tuaro i te mau tuio pape, te mau vahi haumitiraa, e te tahua tei tamaumauhia.

No te tahi area taime, ua fanaˈo te mau Ite no Iehova i te hoê taairaa maitai e te oire no Cádiz. I te mau matahiti atoa, e horoa maitai te apooraa oire i te Tahua tuaro no Carranza i te mau Ite no ta ratou tairururaa mataeinaa o te matahiti. No reira, te oaoa nei te mau Ite i te rave i te mea ta ratou e nehenehe no te tataî maitai i te tahua tuaro.

Taa ê atu râ i te mau ohipa i te pae tino i te tahi taime, te haere noa nei te mau Ite no Iehova i te mau oire tapiri no te tauturu i te huiraatira na roto i te tahi atu ravea. Te faaite ra ratou i te “parau apî maitai, MN” o te Basileia o te Atua. Parau mau, eita ratou e faaô i roto i ta ratou taviniraa i mua i te taata ia aruehia ratou e te mau taata. Te faatupu ra ratou i te reira ei auraroraa i te faaueraa a Iesu e poro i te “[“parau apî maitai,” MN] o te basileia” e “e faariro i te mau fenua atoa ei pǐpǐ.” (Mataio 24:14; 28:19) Na roto i teie ravea, te tiaturi ra te mau Ite no Iehova e tavini i te huiraatira na roto i te haapiiraa i te mau taata i roto i “te eˈa parau-tia.”—Maseli 12:28.