Te tamaˈi o tei haamou i te 19raa o te senekele

1914

MA TE feruri no nia i te mileniuma apî, ua papai o Charley Reese, papai vea no The Orlando Sentinel, e: “Aitâ i oti atura te tamaˈi 1914-1918 o tei haamou i te 19raa o te senekele.” Eaha ta ˈna e hinaaro ra e parau? Te faataa ra oia e: “Aita te aamu e arataihia ra e te taio mahana. Aita i hope te 19raa o te senekele—tei faataahia mai te hoê anairaa o te mau tiaturiraa, mau manaˈo noa, mau peu e mau huru pae morare—i te 1 no Tenuare 1901. Ua hope i te matahiti 1914 ra. Hoê â huru ia haamata te 20raa o te senekele, faataahia mai te hoê â huru tereraa. . . .

“No roto mai te rahiraa o te mau aroraa atoa o tei haapeapea ra ia tatou i te roaraa o to tatou oraraa i taua tamaˈi ra. O taua tamaˈi ra te tumu o te rahiraa o te mau manaˈo maramarama e ihotumu. . . .

“E manaˈo vau e ua faatupu te Tamaˈi Matamua i te taua huru ati ra no te mea ua vavahi oia i te tiaturiraa o te taata oia hoi e nehenehe ta te taata e faataa i to ˈna oraraa. . . . Ua turai taua tamaˈi ra i te taata ia faarue i taua tiaturiraa hape. Aita hoê o na pae e piti o te tamaˈi i taui noa ˈˈe i te eˈa o ta ˈna e rave ra. Ua haamou oia i te hau Beretane e te hau Farani. Ua haapohe roa oia i te ui taurearea maitai aˈe no Beretane, Farani, e Helemani. . . . I roto noa i te hoê area tau poto, ua haapohe oia 11 mirioni taata.”

Hau atu i te 120 matahiti i te maoro, ua faataa te mau Ite no Iehova e na te matahiti 1914 e faahope i te mea o ta Iesu e parau ra “te tau faataahia o te mau nunaa.” (Luka 21:24, MN) I roto i taua area matahiti ra, ua faateronohia o Iesu Mesia i faatia-faahou-hia mai e i faahanahanahia ei Arii o te Basileia i te raˈi. Na roto i te arai o taua Basileia ra, e haamou roa ïa o te Atua ra o Iehova i te mau mauiui atoa e itehia ra i roto i teie senekele.—Salamo 37:10, 11; Koheleta 8:9; Apokalupo 21:3, 4.

[Faaiteraa i te fatu o te hohoˈa i te api 32]

U. S. National Archives photo