Te hoê Bibilia apî na roto i te reo Heleni no teie nei tau
UA RIRO na te 23 no Atete 1997 ei mahana taa ê no te feia i haaputuputu mai i te Tairururaa Mataeinaa “Te faaroo i roto i te Parau a te Atua” i Heleni. I te pae hopea o te rururaa o te avatea, ua matara mai te hoê Bibilia apî—te Tatararaa a te ao apî o te mau Papai Moˈa na roto i te reo Heleni no teie nei tau. No to ratou hitimahuta, ua pahono mai te feia i tae mai, i te hoê â taime ma te roimata o te oaoa e te tia-noa-raa ma te popou!
Mai te matahiti 1905, ua faaohipa na te mau Ite no Iehova i te huriraa o te Bibilia o te senekele 19 neneihia e te hoê ekalesiatiko Orthodoxe Heleni. Ua tauturu maitai teie Bibilia ia ratou e rave rahi matahiti i te maoro. I te tahi mau taime râ, ua manaˈo te mau Ite no Iehova e e titauhia i te hoê Bibilia papu e te ohie aˈe ia taa. I te matahiti 1993, ua oaoa roa ratou i te fanaˈoraa i te tatararaa Heleni o te Tatararaa a te ao apî o te mau Papai Heleni Kerisetiano. I teie nei râ, ua hau atu ïa to ratou oaoa i te fanaˈoraa i te taatoaraa o te Bibilia na roto i te reo Heleni no teie nei tau.
Ua pii te hoê Ite anaanatae i te Tatararaa a te ao apî “e rohipehe, e mataˈi haumǎrû o te afai i te reo o Iehova, e no te taime matamua e nehenehe ai tatou e taa maitai ai i roto i to tatou iho reo.” Ua haamata vetahi i te taio i ta ratou Bibilia apî i to ratou iho â hoˈiraa i te fare. Aita te hoê taata oaoa i ruru mai i vaiiho noa ˈˈe i ta ˈna Bibilia e tae roa ˈtu i te hora hoê i te poipoi, i to ˈna faaotiraa i te taio i te taatoaraa i te buka a Ioba!
Ua riro te Tatararaa a te ao apî o te mau Papai Moˈa na roto i te reo Heleni ei faahopearaa o na tau hitu matahiti maimiraa. Te parau te hoê rata tei faataehia mai e: “E nehenehe outou e papu maitai e e tauturu rahi te Tatararaa a te ao apî ia tatou ia tauturu i te feia aau rotahi ia haapii no nia ia Iehova.”