Te faatia ra te feia poro i te Basileia

Te faaohiparaa i te mau ravea atoa

UA MATAUHIA na te mau Ite no Iehova na te ao nei no ta ratou ohipa haapiiraa Bibilia. Te faanaho atoa nei râ ratou i te mau porotarama o te horoa i te tahi atu mau maitai na te totaiete. Mai ta te mau faahiˈoraa no Equateur mai e faaite mai ra, ua farii-maitai-hia taua taviniraa i te huiraatira ra.

◻ Ua hinaaro te faatereraa o te hoê fare hamaniraa hiˈo rahi e faatupu i te hoê haapiiraa no nia i te mau faufaa o te utuafare na ta ratou mau taata rave ohipa. Ua titau te taata faatere i te faufaa o te feia rave ohipa e rave rahi perepitero Katolika ia apiti mai aita râ hoi i pahonohia mai. Ua parau te hoê perepitero ia ˈna e e mea iti roa te mau perepitero aravihi no te tauaparau i nia i te tumu parau e e au ra e aita roa hoi hoê o ratou i vatahia. I to ˈna faarooraa i te reira, ua rave te hoê vahine rave ohipa Ite no Iehova i te mau faanahoraa no te hoê taeae o te rave tamau ra i roto i te tuhaa fenua tapihooraa no te haere e mataitai i te fare hamaniraa hiˈo.

I te mahana noa i muri iho, ua tauaparau te Ite i te taata haapao i te faufaa o te feia rave ohipa ma te pûpû atu i te haapiiraa. Ua huti te tabula o te mau tumu parau i nia e rave rau mau papai a te Taiete Watch Tower. Ua maere roa te taata faatere. Ua tapea mai oia e toru tumu parau no te tauaparauraa—te mau taairaa totiale, mau taairaa i te vahi raveraa ohipa, e te mau taairaa i roto i te utuafare. Ua ravehia ˈtura te mau faanahoraa no te tuatapapa i te haamaramaramaraa e te taatoaraa o te feia rave ohipa.

Ua tufahia ihora te feia rave ohipa na roto e hitu pǔpǔ e e 30 taata i roto hoê pǔpǔ, i muri aˈe ïa na taeae aravihi e toru i te faaiteraa ˈtu i te haamaramaramaraa ia ratou. Eaha ˈtura ïa te mau faahopearaa? Ua ani e rave rahi o ratou e ia farereihia ratou i to ratou fare, e ua operehia e 216 buka tauturu no te haapii i te Bibilia. No to ratou maere rahi i ani ai te mau tia faatere e e nehenehe anei ta te mau Ite e faaineine mai i te tahi atu â mau oreroraa parau.

◻ Aita i maoro aˈenei, ua tuu te fenua Equateur i te hoê ture o te farii ia haapiihia te haapaoraa i roto i te fare haapiiraa. Ua pii te hoê tuahine mitionare i te vahine faatere haapiiraa tuatahi e ua ani oia e mea nafea te tereraa o te ture apî. Ua faataa ˈtu te vahine faatere e ua ravehia te hoê tutavaraa no te haamata i te hoê porotarama no nia i te haamoriraa ia Maria aita râ i tupu noa ˈˈe. Ua farii te vahine faatere i to te tuahine faataaraa e e nehenehe taua huru haamoriraa ra e haafifi i te mau tamarii e ere i te Katolika. “Tera râ,” ua parau te tuahine mitionare e, “te vai ra ta matou hoê porotarama no te haapii i te mau faaueraa tumu morare no roto mai i te Bibilia o tei ore e faahepo i te hoê taata ia farii i te hoê haapaoraa taa maitai.” Ua pahono mai te vahine faatere e: “Afea oe e nehenehe ai e haere mai? Ananahi atu?” I muri aˈe to te tuahine mitionare faaiteraa ˈtu i te buka ra Faaroo i te Orometua rahi, ua faaotihia e e hinaaro ratou e tuatapapa i te pene ra “E oaoa te feia parau hau.”

I to ˈna hoˈiraa mai, ma te apeehia e te vahine faatere ua farerei atu te tuahine mitionare, e toru hora i te maoro, e hitu piha haapiiraa taa ê. I muri aˈe i te tauaparauraa e te piha tuhaa pae o te piha haapiiraa tuatahi, ua parau te hoê o te mau tamarii haapii e: “E vahine e, mai te peu e tia ia oe ia farerei iho â oe i te piha tuhaa ono. Te opua noa nei ratou e taparahi ia matou e e haamata i te moto!” Ua faataa te hoê orometua e: “E tumu parau faufaa roa te haavîraa uˈana. E titauhia ia tatou hau atu i te taime no te tauaparau i teie tumu parau.”

Ua ravehia te mau faanahoraa no te hoˈi e farerei i te fare haapiiraa no te tauaparau i te mau upoo parau mai te auraroraa e te haavare. I muri iho, ua noaa mai te mau faahopearaa maitatai roa. Teie nei, ia haere anaˈe te tuahine mitionare na raro na te pae purumu, e haere mai te mau tamarii ma te horo e farii ia ˈna e e ani i te mau uiraa Bibilia. E oaoa roa vetahi i te haafarereiraa ia ˈna e to ratou mau metua. Hau atu, ua haamatahia te hoê haapiiraa Bibilia i te fare e e piti o na tamarii haere haapiiraa.