E haamou anei te Atua i te ao nei?
IA AU i te Pâpa Ioane Paulo II, e nehenehe te taata e hiˈo papu i te tau no a muri aˈe. Na roto i te aamu, o ta ˈna ïa e parau ra, “ua tamau noa te taata i te rave i te hara, peneiaˈe hau atu i te rahi i tei faaitehia hou aˈe i te diluvi.” Noa ˈtu râ, o ta te pâpa ïa e tatara ra, “ia au i te faufaa a te Atua e o Noa, te ite ra tatou i teie nei e aita te hara e turai faahou ra i te Atua ia haamou i te ao o ta ˈna iho i hamani.”
E parau mau anei e eita roa ˈtu te Atua e haamou i te ao nei? Te faaite ra te Bibilia e, i muri aˈe i te Diluvi, ua parau atura te Atua ia Noa e: “E ore roa e hope faahou te mau mea ora i te pohe i te pape diluvi; e ore hoi e diluvi-faahou-hia e pohe roa ˈtu ai te fenua ra.” (Genese 9:11) Te parau ra te pâpa e, ia au i teie mau parau, “e tapea [te Atua] ia ˈna i te haamou i [te fenua].”
Te faaite maitai ra te Bibilia e eita roa ˈtu te Poiete e farii ia haamouhia to tatou nei palaneta. “Area te fenua nei te vai noa nei â ïa,” o ta te Bibilia ïa e parau ra. (Koheleta 1:4) Tera râ, te vai ra te tahi atu mea te haapiihia no nia i te Diluvi—te hoê mea e aita te pâpa i parau.
Ua parau o Iesu e e riro te mau tupuraa i nia i te fenua nei, ia vai mai oia, “mai tei te anotau ra ia Noa” i te taime “aore roa [te taata] i ite, e roohia noa ihora ratou e te diluvi, pau roa ˈtura ratou.” (Mataio 24:37-39) Hoê â huru atoa, ua papai te aposetolo ra o Petero e “i pohe ai te reira [“ao,” MN] i te ninaraahia e te miti,” oia atoa, e roohia ˈtu teie nei ao “i te mahana haavaraa, i te poheraa o te feia paieti ore ra.”—Petero 2, 3:5-7.
Ua moehia anei ia Iesu e ia Petero te faufaa a te Atua ia Noa? Aita roa ˈtu! Mai ta ˈna i faaau atu ia Noa, eita te Atua e faaohipa i te diluvi no te faahope i teie faanahoraa ino o te mau mea. I te monoraa, e faaohipa mai o ˈna i te mana o “te Arii o te mau arii, e te Fatu o te mau fatu” o Iesu Mesia. (Apokalupo 19:11-21) No reira, ia au i te Bibilia, e ere te fenua te haamouhia, o te “ao” râ o te feia iino o te hope. (Maseli 2:21, 22; Apokalupo 11:18) I muri iho, “e parahi te feia parau-tia i nia i te fenua, e parahi tamau â ratou i reira.”—Salamo 37:29.