Te arue nei ratou i to ratou Poiete ma te mamû noa

E MAU mataitairaa haviti mau â te mau toparaa mahana. Tera râ, ua riro te mataitairaa i te mahana ia topa i muri mai i teie mouˈa o te mau Alpes no Toscane, i Italia, ei ohipa otahi roa.

Ia hiˈohia na te atea mai, e au ra e te topa ˈtura te mahana i roto i te mouˈa iho, eiaha râ i muri mai. No te aha? No te mea e apoo to nia i te tupuai o teie mouˈa e au ra e ua taraihia e te natura i roto i taua mouˈa ra. Oia mau, ua tano maitai te iˈoa o teie vahi teitei, o Monte Forato—oia hoi, te Mouˈa Puta. No te mea e te ohu nei te fenua ma te haaati i te mahana, e piti noa taime i te matahiti e nehenehe ai te feia e mataitai na roto atu i te apoo, e ite i te mahana e au ra e te topa ˈtura i roto ia Monte Forato.

Mai te tahi atu mau mea i poietehia, te arue nei te mau raˈi e vai mamû noa ra i to ratou Poiete. Nafea? Mai ta te hoê ïa hohoˈa peni nehenehe mau e faatupu i te arueraa no te taata aravihi i peni ia ˈna. Oia mau, te faahiti nei te mau taoˈa o te raˈi i te puai, te paari, e te hanahana o Iehova. Mai ta te papai salamo i faaite, “te parau hua nei te mau raˈi i te hanahana o te Atua! e te faaite nei te reva i te ohipa a tana rima!” (Salamo 19:1; 69:34) I te mea e te arue nei te mahana e vetahi atu mau taoˈa mamû noa i to ratou Poiete, eaha ˈtu ïa tatou, ia na reira atoa tatou e tia ˈi!—Salamo 148:1, 3, 12, 13.