Te hoê pahonoraa putaputa maitai

AITA i maoro aˈenei, ua nenei te Catholic Herald, te hoê vea Katolika Roma no Beretane, i te rata i muri nei, no ǒ mai oia i te hoê taata taio no Galles: “I te hoê po, ua haere mai e piti Ite no Iehova i to ˈu fare. Ua parau atura vau ia raua e na te Ekalesia Katolika i haapapu i te tia-mau-raa o te Faufaa Apî ta raua e faahiti maira. I to ˈu hitimahuta, ua farii maira te hoê o raua i te reira. ‘Oia mau,’ o ta ˈna ïa i parau mai, ‘ua haapapu iho â outou i te Faufaa Apî, tera râ, aita outou e pee ra i te reira. Ua parau na o Iesu e, “ia aroha outou ia outou iho, mai ia ˈu e aroha ˈtu ia outou na,” tera râ, te taparahi pohe nei outou ia outou iho. I teie tamaˈi hopea nei, ua haapohe te mau Katolika i te mau Katolika, aita râ te mau Ite no Iehova i na reira i to ratou mau [hoa] Ite.’ Ua farii atura vau i taua parau ra. Nafea ïa tatou [te mau Katolika] e nehenehe ai e pure no te tahoê i to tatou ‘mau taeae taa ê,’ e aita hoi tatou iho e na reira nei? E tia ïa ia tatou ia faaafaro na mua i tera hape rahi.”—Ioane 15:12.

Ua haamata na tamaˈi rahi matamua e piti o te 20raa o te senekele i roto i te Amuiraa faaroo kerisetiano e ua haapohe oia tau 50 e tae atu i te 60 mirioni taata. Ma te papu maitai, e nehenehe e parauhia e aita te mau Ite no Iehova i faaô ia ratou i roto i na tamaˈi e piti, e te mau tamaˈi atoa e tupu ra i teie nei. E mea nafea ïa? E tia ia outou ia paheru no te ite hau atu â i te mau taairaa puai o te aroha e te tahoêraa kerisetiano e vai nei i rotopu e hau atu i te pae mirioni mau Ite no Iehova na te ao atoa nei.—A faaau e te Isaia 2:4.

[Faaiteraa i te fatu o te hohoˈa i te api 32]

U.S. National Archives photo