Faaunaunahia i te tapea tariˈa auro

MAI te matamua mai â, e mea au-rahi-hia te taoˈa auro no to ˈna faufaa e te nehenehe. I to ˈna riroraa mai ei faatere hau nui no te fenua Aiphiti, ua farii na o Iosepha no ǒ mai ia Pharao ra te hoê fifi arapoa auro. (Genese 41:42) Ua horoahia mai na Rebeka te hoê tapea ihu auro e na tapea auro e piti no te rima, oia te faufaa i teie nei mahana 1 400 dala Marite. (Genese 24:22) E mea papu maitai, ua fariihia teie mau taoˈa horoa maitatai ma te mauruuru e ua tamauhia ma te oaoa.

Te parau nei te Bibilia no te taoˈa taipe o tei hau atu te faufaa i te mau mea i tamauhia e Iosepha raua o Rebeka. Te parau ra te Maseli 25:12 e: “Mai te poe auro ra, e te taoˈa nehenehe auro maitai ra, oia te aˈo taata paari i te tariˈa faaroo ra.” Ia horoa te taata aˈo i te aˈoraa haamauhia i nia i te Parau a te Atua, eiaha râ i to ˈna iho manaˈo, te horoa mau ra ïa oia i te taoˈa horoa faufaa. No te aha? No te mea no ǒ mai ia Iehova ra taua aˈo ra. Te parau maira te Bibilia ia tatou e: “Eiaha oe i inoino, e tau tamaiti, i te aˈo a Iehova, eiaha hoi e fatimauu i ta ˈna aˈoraa mai. O tei herehia e Iehova ra, o ta ˈna ïa e aˈo mai, mai te metua e aˈo i te tamaiti ta ˈna e here ra.” (Maseli 3:11, 12) Ia farii anaˈe te taata aˈohia ma te haehaa e ia faaohipa oia i te aˈo, mai te taata faaunauna i te tapea tariˈa auro ra ïa o ˈna. E mea tano maitai ta te maseli faauruahia a te Bibilia e parau ra e: “E ao to te taata i noaa ia ˈna te paari; te taata i noaa ia ˈna te ite ra! O te taoˈa hoi e hoona ˈi oia ra, e maitai rahi ïa i to te ario ra, e ia rahi hoi oia ra, e maitai rahi ïa i to te auro maitai ra.”—Maseli 3:13, 14.