Te hoê lamepa no te aratai ia outou i nia i te eˈa o te oraraa nei

“UA ITE hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” (Ieremia 10:23) Mea na roto i teie nei mau parau to te peropheta ra o Ieremia faaiteraa e eita te mau taata e nehenehe e haere ma te manuïa na nia i te eˈa o te oraraa nei ma te tauturu-ore-hia. Ihea e iteahia mai ai teie huru tauturu? Te pahono ra te papai salamo i roto i ta ˈna pure i te Atua ra o Iehova e: “E lamepa ta oe parau i to ˈu nei avae, e tiarama no to ˈu nei mau eˈa.”—Salamo 119:105.

E riro te feia o te haapii ra i te Parau a te Atua, te Bibilia Moˈa, e o te faaohipa ra i te mea o ta ˈna e parau ra, mai te taata o te haamata ra i te hoê tere i te aahiata. Na mua, eita ta ˈna e nehenehe e ite maitai no te mea e mea poiri. Teie râ, a haamata ˈi te mahana i te hiti mai, te ite maitai roa ˈtura oia. I te pae hopea, tei nia roa te mahana. Te ite papu ra oia i te mau mea atoa. Te faahaamanaˈo maira teie faahohoˈaraa i te hoê maseli a te Bibilia e: “O te eˈa hoi o te feia parau-tia ra, e au ïa i te maramarama anaana ra, o tei tupu noa te anaanaraa e tae noa ˈtu i te avatea mau ra.”—Maseli 4:18.

Eaha ïa no te feia o te patoi ra i te aratairaa a te Atua? Te na ô ra te Bibilia e: “O te eˈa ra o te paieti ore ra, e au ïa i te pouri; aore ratou i ite i ta ratou e turori ra.” (Maseli 4:19) Oia mau, ua riro te paieti ore mai te taata e turori ra i roto i te pouri. E au ra e mea poto roa ˈˈe atoa to ratou manuïa, no te mea “aore e paari, aore e ite, aore e parau imihia, e tupu ai ia Iehova.”—Maseli 21:30.

No reira, e pee anaˈe i te aratairaa a te Parau a te Atua, te Bibilia. Mai te peu e e na reira outou, e ite ïa outou e mea mau teie mau parau a te Maseli 3:5, 6: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.”