O vai te faatere?

“O VAI teie e faatere nei i te ao?” Mai te peu e, e ui noa mai te hoê taata i taua uiraa ra ia oe, nafea oe ia pahono atu? E nehenehe te feia faaroo e parau e, o “te Atua” aore ra o “Iesu.” Ua horoa te hoê tumu parau e itehia ra i roto i te hoê vea no Bahamas ra, The Freeport News, i te hoê pahonoraa ta vetahi e ore e tiai ra.

“Ua ite au i te hoê api parau iti i mua i to ˈu uputa,” mea na reira to te papai parau omuaraa i ta ˈna papairaa i te tumu parau. “Tei matarohia, e haavare ite au i te reira, i taua râ taime ra, ua hinaaro vau e taio i te reira. Te ui nei te upoo parau, ‘O vai mau na te faatere o te ao nei?’” Na roto i te taioraa i te api parau iti Bibilia, ua haapii teie vahine e e ere o te Atua aore ra o Iesu, te faatere o teie ao, o te Diabolo o Satani râ.—Ioane 12:31; 14:30; 16:11; Ioane 1, 5:19.

“A hiˈo na i te mau taparahiraa taata riaria,” ta te api parau iti ïa e faataa ra. “Ua faaohipa te taata i te mau piha mǎhu taero, te mau aua haavîraa taata, te mau pupuhi tutuha auahi, te mau paura napalm, e vetahi atu mau ravea hairiiri no te haamauiui e no te taparahi te tahi e te tahi ma te aroha ore. . . . Eaha te mau puai e turai ra i te taata ia rave i teie mau ohipa faufau aore ra e aratai ra ia ratou i roto i te mau huru tupuraa i reira ratou e turaihia ˈi ia rave i te mau peu mehameha? Aita anei outou i uiui aˈenei e peneiaˈe, na te tahi puai ino itea-ore-hia e turai ra i te taata ia rave i teie mau ohipa haavîraa puai?” E mea maere anei e ia pii te Bibilia ia Satani “te atua o teie nei ao ra”?—Korinetia 2, 4:4.

Ma te oaoa, te fatata maira te taime i reira o Satani e ta ˈna mau demoni e mou ai. “Te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.” (Ioane 1, 2:17) Oia mau, te tǎpǔ nei te Bibilia e, o te feia e rave i te hinaaro o te Atua, e tiaturiraa to ratou no te ora e a muri noa ˈtu i roto i te hoê ao apî e te parau-tia. (Salamo 37:9-11; Petero 2, 3:13; Apokalupo 21:3, 4) Auê ïa tamahanahanaraa ia matara anaˈe i te mana ino o Satani e o ta ˈna mau demoni!

I muri aˈe i te hiˈo-poto-raa i te mau manaˈo o taua api parau iti ra, ua faaoti te taata papai o te tumu parau ra o te vea ra The Freeport News i te na ôraa e: “E oaoa rahi to ˈu i te taioraa i teie api parau iti . . . no te mea e e peapea rahi atoa to ˈu no nia i te huru o teie ao, e o vai te faatere.”