“O vau anaˈe i rotopu e rave rahi feia ta oe i taui”
I TE avaˈe Tenuare 1996 i mairi aˈenei, ua tupuhia o Carol i te maˈi mariri ai taata i roto i te roro. E 60 matahiti to ˈna e ua ora noa na oia ei vahine oaoa, tino maitai e te hoê parau faaitoito no te taata atoa. I teie nei râ, te rohi ra te mau taote no te arai i te maˈi pohe o te rahi noa ˈtura. A tupu noa ˈi ta ˈna aroraa, ua faataehia mai teie rata na Carol:
“E Carol iti e:
“Te haapeapea nei au ia oe no to oe maˈi. Auaa râ, e tiaturiraa mau to tatou o ta te Bibilia e tauturu maira ia tatou ia ite e ia here. Teie tiaturiraa, ia faatere ïa te Basileia o Iehova i te fenua e nehenehe ai tatou e ora i roto i te hoê paradaiso, te hoê tau ta tatou paatoa e tiai maite nei.
“Te hinaaro nei au ia ite oe e ua faaora ta oe pororaa e rave rahi taata i te pohe mure ore. Tei roto atoa vau i teie feia. Aita vau e papu ra e te haamanaˈo ra anei oe i to tâua farereiraa i te taime matamua. I taua tau ra, e 20 matahiti to ˈu. E rouru roroa to ˈu, e hoo na vau i te raau taero, e e ôri noa na vau e te hoê pǔpǔ taata ohipa ino. E pupuhi ta matou pauroa e aita to matou e here mau no vetahi ê, no matou iho râ.
“Ua patoto mai oe i to ˈu uputa e te tahi atu Ite e ua pûpû mai oe i Te Pare Tiairaa e te A ara mai na! Ua tamata vau i te horoa ˈtu i te hoê dala marite e ua parau atu vau e eita vau e hinaaro i te mau vea. Ua faaite mai oe e aita outou e poro ra ia roaa noa mai te tahi ô. Ua parau mai oe e te rave ra outou i te hoê ohipa no te tauturu i te taata ia taio i te Bibilia. Aita vau e papu ra e ua rave anei vau i te mau vea aore ra ua taio anei. Tera râ, ua tanu oe i te huero o te parau mau i roto i to ˈu oraraa.
“Tau matahiti i muri iho, ua haere mai te tahi atu Ite, o Gary, i te fare o to ˈu mama e tei reira atoa vau. Ua parau vau ia ˈna e ua haere mai oe e farerei ia ˈu tau matahiti na mua ˈtu. Mea maoro to Gary tuatapaparaa i te Bibilia e o vau, e bapetizohia ˈtura vau i te matahiti 1984. I teie nei, te haapii ra vau i ta ˈu mau tamarii i te parau mau o te Basileia o te Atua.
“Te papu ra vau e o vau anaˈe i rotopu e rave rahi feia ta oe i taui i roto i ta oe mau matahiti taviniraa ma te haapao maitai. Tera râ, na roto i teie hamani maitai, auaa oe i nehenehe ai au e to ˈu utuafare e ite i te Atua Rahi, o Iehova, e i ta ˈna Tamaiti, o Iesu Mesia. Te tiai maite ra vau i te mahana e ite ai au ia oe i roto i te faanahoraa apî o te mau mea nei, ia horoi anaˈe Iehova i te mau roimata atoa o to tatou mata, e ia ore roa te pohe.—Apokalupo 21:4.
“Area ia ˈu e to ˈu utuafare, te oaoa nei matou i te mea e ua tanohia matou i te matauraa ia oe e e tuhaa matou no ta oe ohipa pororaa. Mauruuru.
“Na roto i te here taeae,
O Peter”
I muri aˈe i te maˈiraahia e ono avaˈe, ua pohe ihora o Carol i te avaˈe Mati 1996, ma te ueue e rave rahi huero o te parau mau i te roaraa e 35 matahiti o to ˈna oraraa ei vahine poro ieie. Ua haapii oia e aita hoê aˈe taata i ite e afea râ te hoê huero e maahia ˈi, noa ˈtu tau matahiti i muri aˈe.—Mataio 13:23.