Te parau mau no nia i te po auahi
TE NA ô ra te hoê tumu parau a te apooraa haapiiraa faaroo a te Ekalesia no Beretane e, e ere iho â te po auahi i te hoê vahi auahi ura; o te hoê râ aore e aita hoê aˈe mea to roto. “E rave rahi tumu i ravehia ˈi teie tauiraa,” o ta te tumu parau ïa e faataa ra. “I rotopu râ i teie mau tumu, te vai nei te patoiraa morare no roto e no rapaeau atoa i te faaroo kerisetiano, e faahapa ra i te hoê haapaoraa o te faariaria, e te papuraa i te taata e, aita roa ˈtu te parau no te hoê Atua o te faautua i te mau mirioni taata i te haamauiuiraa mure ore, e tuea ra i te faaiteraa no te here o te Atua na roto i te Mesia.”
Aita teie huru-ê-raa i mua i te haapiiraa matauhia no nia i te po auahi, e itehia ra i roto anaˈe i te Ekalesia no Beretane. E mea fifi roa no te mau taata ua rau te huru to ratou faaroo, ia haamori i te hoê Atua tahoo o te tutui i te feia hara i te auahi. “Te hiaai nei te taata i te hoê Atua mahanahana e te aupuru,” o ta Jackson Carroll ïa e parau ra, e orometua haapii oia i te haapaoraa e te totaiete, i te Haapiiraa Divinity no te Fare haapiiraa tuatoru Duke. “Aita roa ˈtu e tu ra i te huru feruriraa o teie nei tau, ia faahitihia te parau no te hara e te hapa.”
Mai mutaa ihora mai â to te mau Ite no Iehova tiaturiraa e, ia au i ta te Bibilia e haapii ra, te po auahi, o te menema matauhia ïa no te taata pohe—e ere râ i te hoê vahi haamauiuiraa i roto i te auahi. Te tiaturi nei ratou i te reira, eiaha no te mea e manaˈo fariihia te reira e te taata, no te mea râ e te na ô ra te Bibilia e: “Aita râ a te feia i pohe ra e parau itea. . . . aore hoi e ohipa, aore e imiraa, aore hoi e ite, aore hoi e paari, i te apoo [“po auahi,” ia au i te tatararaa Katolika a Douay] ta oe e haere na.”—Koheleta 9:5, 10.
Ia au i teie faataaraa maramarama maitai no nia i te huru o te feia pohe, ua papai o Charles Taze Russell, te peretiteni matamua a te Taiete Watch Tower, i te matahiti 1896 ra e: “Aita roa ˈtu e vai ra [i roto i te Bibilia] te parau no te hoê vahi haamauiuiraa mure ore mai ta te mau haapiiraa faaroo e te mau buka himene, e ta te mau orometua e rave rahi, e haapii hape nei. Te vai nei râ te hoê ‘po auahi,’ aore ra sheol, hade, tei riro ei utua no te huitaata taatoa, no te hara hoi a Adamu, e ua hoo-pauroa-hia mai tatou na roto i te pohe o to tatou Fatu; e te ‘po auahi,’ o te apoo ïa—oia hoi te pohe.”
Ua hau atu i te hoê senekele i teie nei to te mau Ite no Iehova haapiiraa i te parau mau a te Bibilia no nia i te po auahi.
[Hohoˈa i te api 32]
Charles T. Russell