Te mau haamaitairaa o te hoê mafatu hau

MEA maoro i teie nei to te ite aivanaa i te pae rapaauraa no teie tau, iteraa e mea ino te riri mâha ore no te tino o te taata. Hau atu i te hoê hanere matahiti i teie nei, ua parau Te vea a te taatiraa a te mau taote Marite (JAMA [Beretane]) e: “Ia pohe taue te hoê taata i te taime a iria ˈi oia, e parau-noa-hia e, peneiaˈe, e mafatu paruparu to ˈna, e aita to ˈna mafatu i faaoromai i te faaheporaa a to ˈna feruriraa iria. Aita râ hoê taata e manaˈo ra e te tumu i pohe ai taua taata ra, no te mea ïa e mea maoro e mea pinepine oia i te hae, e na te reira i haaparuparu roa i to ˈna mafatu.”

Eita râ te feia haapii i te Parau a te Atua, te Bibilia, e maere i teie mau parau. Tau 29 senekele hou te vea ra JAMA e faahiti ai i te mau atâtaraa o te riri, ua faauruahia te Arii ra o Solomona no te papai e: “Te hoê mafatu hau, o to te tino ïa ora.” (Maseli 14:30, MN) E parau mau â te reira i teie nei mahana.

Na roto i te atuaturaa i te hoê feruriraa hau, e paruruhia tatou i te mau maˈi e rave rahi o tei taai-pinepine-hia i te hepohepo rahi, mai te neˈiraa toto puai, te mauiui upoo, e te mau fifi o te hutiraa aho. Taa ê atu râ i te maitairaa i te pae tino, e nehenehe to tatou mau taairaa e o vetahi ê e haamaitaihia mai te peu e e tutava tatou i te “faarue i te tairoiro, eiaha [e] riri.” (Salamo 37:8) Mea ohie roa no te taata ia haafatata ˈtu ia Iesu no to ˈna mǎrû e no to ˈna tapitapi aroha mau no ratou. (Mareko 6:31-34) Oia atoa, e riro tatou ei tamǎrûraa no vetahi ê mai te peu e e atuatu tatou i te hoê mafatu hau.—Mataio 11:28-30.