‘Te anaanatae nei ratou i te tauturu ia vetahi ê’

TEIE te parau ta te hoê mutoi no te oire no New York i parau no nia i te mau Ite no Iehova. Ua aparau atu o ˈna ia Kathleen, te hoê tavini ma te taime taatoa i te pu rahi a te mau Ite no Iehova no Brooklyn, i New York.

I to ˈna faafaaearaa i te avatea, i te hoê mahana veavea e te maitai o te tau auhune, ua parahi Kathleen i nia i te hoê parahiraa i te vahi ra tei piihia Promenade. Te faarooroo ra o ˈna i te hoê haruharuraa ripene ma te mau taoˈa e tuuhia i roto i te mau tariˈa no te faaroo. I te hoê tahua tauraa manureva tautau na te reva i te tahi aˈe pae o te East River, ua haamata te mau faaineineraa no te revaraa o te pâpa, o tei mataitai haere i te oire. Ua haapuaihia te mau ravea parururaa i te mau vahi atoa, e ua tere haere e rave rahi mutoi na nia i te Promenade. Ua haafatata ˈtu te hoê o ratou ia Kathleen e ua ani atu e eaha ta ˈna e rave ra. Ua pahono atura Kathleen e: “Te faaroo nei au i te hoê ripene na roto i te reo Rusia. Inaha, e Ite no Iehova vau, e te hinaaro nei au i te haapii i te reo Rusia no te tufa ˈtu i te parau apî maitai o te Basileia o te Atua i te mau taata e paraparau ra i te reo Rusia o te ora ra i roto i te oire.”

Ua faahiti te mutoi e ua haafaahiahia oia i te mau Ite no Iehova i roto i na 15 matahiti i mairi aˈenei to ˈna tiairaa ei mutoi i te oire no New York. Te na ô ra oia e: “Te hiˈo nei au i te mau Ite no Iehova mai te hoê haapaoraa faanahohia, i reira te mau taata e anaanatae mau ra i te tauturu ia vetahi ê i roto i te tuhaa fenua.”

Ua matauhia te mau Ite no Iehova na te ao nei na roto i te ohipa pororaa ta ratou e rave ra i tera e i tera uputa. (Ohipa 20:20) A faaite ai ratou e o te Basileia o te Atua te ravea otahi no te mau fifi e haapeapea ra i te huitaata nei, te tauturu atoa ra ratou i te mau taata ia haamaitai i to ratou huru oraraa ma te faaitoito ia ratou ia faaohipa i te mau faaueraa tumu a te Bibilia i roto i to ratou oraraa i te mau mahana atoa. Ei hiˈoraa, te faaitoito ra te mau Ite ia horoa te mau metua i te hoê huru oraraa i te fare o te tauturu i te haapiiraa. Te faaue nei ratou i te mau taata ia riro ei mau taata haavare ore e te faatura i te ture, ma te faaitoito atu ia ratou ia noaa te aravihi e te mau huru maitatai ta te hoê paoti ohipa e nehenehe e haafaufaa.

Oia mau, mea anaanatae roa na te mau Ite no Iehova i te tauturu i te mau taata i roto i te tuhaa fenua no te haamaitai i to ratou oraraa. Te titau-manihini-hia ˈtu nei outou ia pahono i teie pûpûraa i raro nei.