“Tei rotopu tatou pauroa i te hoê â utuafare fetii”

I TE mau matahiti i mairi aˈenei, ua parare te au-ore-raa i te pae faaroo e i te pae nunaa na te ao nei. Ua faatupu te mau taa-ê-raa i rotopu i te mau opu fetii i te mau taparahiraa, te haavîraa e vetahi atu mau ohipa riaria haama mau. Ia au i te hoê parau a te hoê taatiraa piihia Amnesty International, ua faahepo te mau ofatiraa i te mau tiaraa tura o te taata hau atu e 23 mirioni feia na te ao nei ia faarue i to ratou vahi nohoraa i roto i te matahiti 1994 ra.

I Rwanda noa, ua taparahihia tau 500 000 taata e ua riro hau atu i te 2 000 000 ei feia i horo ê i to ratou fenua i muri aˈe i te haavîraa uˈana tei tupu taue i rotopu i te mau Tutsi e te mau Hutu. “O te mau Ite no Iehova iho â râ tei hamani-ino-hia,” o ta te vea Beletita ra Le Soir ïa e faatia ra, “no to ratou patoiraa i te rave i te pupuhi.” Eita te mau Ite no Iehova e faaô atu i roto i te mau aroraa mauhaa tamaˈi. Noa ˈtu râ, ua haapohehia tau hanere o ratou i roto i te haavîraa uˈana. Te faahaamanaˈo maira te reira i te mau parau a Iesu i ta ˈna ra mau pǐpǐ e: “No te mea râ e ere outou i to teie nei ao, . . . e riri mai ai teie nei ao ia outou.”—Ioane 15:19.

Ua ora na te hoê utuafare Ite no Iehova—Eugène Ntabana, ta ˈna vahine, e na tamarii e piti—i te oire pu ra o Kigali. Ia faataa anaˈe oia i te tiaraa amui ore Kerisetiano i to ˈna feia tapiri, ua paraparau pinepine o Eugène no nia i te bougainvillée, te hoê tiare e toro i nia e tupu maitai ra i te mau pae veavea.—Mataio 22:21.

“I ǒ nei i Kigali,” o ta Eugène ïa e faataa, “e horoa mai te mau bougainvillée i te tiare uteute, tarona e te tahi mau taime te mau tiare uouo. E bougainvillée pauroa râ. Hoê â ïa e te mau taata. Noa ˈtu â ïa mea taa ê to tatou nunaa, to tatou iri, aore ra opu fetii no reira mai tatou, tei rotopu tatou pauroa i te hoê â utuafare fetii, te utuafare huitaata nei.”

Ma te peapea roa râ, noa ˈtu to ratou huru hau e to ratou tiaraa amui ore, ua haapohehia te utuafare Ntabana e te hoê nahoa taata taehae. Tera râ, ua pohe ratou ma te taiva ore. E nehenehe tatou e tiaturi e e faatupu te Atua ra o Iehova i ta ˈna ra parau tǎpǔ no teie mau taata, e e faatiahia mai ratou no te fanaˈo i te hoê ao i reira aita e ino faahou. (Ohipa 24:15) I reira, te utuafare Ntabana, e vetahi ê atu, e ‘oaoa ˈi i te rahi o te hau ra.’—Salamo 37:11.