Te hoê vea o te haaputapû i te mafatu

E RAVE rahi vea o te nenei-tamau-hia ra na te ao nei no te haamâha i te hinaaro rahi o te feia taio i te haamaramaramaraa aore ra i te faaanaanataeraa manaˈo.

No te aha e mea taa ê mau te vea i roto i to oe na rima? E horoa mai paha te rata i raro nei, i faataehia i te amaa o te Taiete Watch Tower i Helemani, i te hoê pahonoraa:

“Mauruuru roa e to ˈu mau taeae here e, no ta outou mau tutavaraa e ta outou ohipa. Ia hoˈi anaˈe au e ta ˈu nau tamaroa e piti na te putuputuraa, noa ˈtu e e hora 9 e te afa i te po, e tia iho â ia ˈu ia faaroo i Te Pare Tiairaa hopea nei [i nia i te ripene]. Ia horoi anaˈe vau i te mau auˈa, e haamata vau i te faaroo i te tumu parau no te haapiiraa matamua (1 no Eperera 1995). Ua manaˈo vau e faaroo faahou â i te reira, faaea ihora vau i ta ˈu ohipa i roto i te piha tutu e ua taio vau i te tumu parau [“E mea faufaa roa outou i mua i te aro o te Atua!”] i roto i Te Pare Tiairaa ma te faaroo atoa i te ripene. Ua putapû roa to ˈu mafatu i te reira, te paratarapha maha e te pae iho â ra. I reira râ, ua tahe to ˈu roimata—aita râ i maoro roa. Ua mauruuru roa vau ia Iehova i te mea e te ora ra vau e tei roto vau i to ˈna ra nunaa, e e nehenehe vau, e te tahi atu feia e faaite i to ˈna ra iˈoa. Aita mau e tumu ia manaˈo e mea faufaa ore tatou. Tei rotopu te varua o Iehova i to ˈna nunaa. Ia faaoromai e ia tapea papu tatou paatoa i te faaroo, ma te tahoê. Ma te aroha kerisetiano, to outou tuahine i roto i te faaroo.”

Ua hau atu i te haamaramaramaraa ta Te Pare Tiairaa e horoa ra. E haaputapû te reira i te mafatu o te feia taio e e haamâha i to ratou mau hinaaro i te maa pae varua e te mau faaitoitoraa i te taime au ra. Oia mau, te horoa ra Te Pare Tiairaa i te “maa i te hora mau ra.”—Mataio 24:45.