Te hoê tupuraa o te parau tohu a te Bibilia
I ROTO i te Fare faaiteiteraa tauihaa tamaˈi a te Hau i Lonedona, i te fenua Beretane, te vai ra te hoê hora otahi roa e te hoê tabula uira taioraa numera. A ohu noa ˈi te hora, e taˈi te tabula taioraa numera i te mau 3,31 tetoni atoa. E i te mau taˈiraa taitahi, e amuihia te tahi atu numera i te taatoaraa. Te faahohoˈa ra te taˈiraa taitahi, te numera taitahi i te hoê tane, te hoê vahine, te hoê tamarii o tei pohe ei faahopearaa o te tamaˈi i roto i teie senekele.
Ua haamata te tabula taioraa numera i ta ˈna iho taioraa i te avaˈe Tiunu 1989 e te manaˈohia ra e e hope te taioraa i te tuiraa po na mua noa ˈˈe i te matahiti 2000. I te reira taime, e tapao te numera i nia i te taioraa numera hoê hanere mirioni—o te numera manaˈohia ïa o te mau taata i pohe na roto i te tamaˈi i te roaraa o te 20raa o te senekele.
Fatata e 2 000 matahiti i teie nei, ua tohu atea mai o Iesu no nia i te hoê tau tei tapaohia e te ‘aroraa te tahi fenua e te tahi fenua e te tahi basileia e te tahi basileia.’ Oia mau, e mea maoro to te mau Ite no Iehova pororaa e ua riro te mau tamaˈi iino o teie senekele, apitihia e te mau rahiraa aueueraa fenua, te mau maˈi pee, te oˈe, e te tahi atu mau ohipa i tupu atoa ei haapapuraa e te ora nei tatou i roto i te ‘mau mahana hopea’—i te taime i muri aˈe i te faaariiraahia te Mesia i nia i te raˈi i te matahiti 1914.—Luka 21:10, 11; Timoteo 2, 3:1.
Ma te faaohipa i te mana iho o te Bibilia, te faaite ra Te Pare Tiairaa i te parau apî maitai e ua fatata te Basileia o te Atua i te haamou i te feia hamani ino e i te faariro i te fenua nei ei paradaiso. E eaha ïa no te tamaˈi i te tau a muri aˈe? Te na ô ra te Bibilia e: “A haere mai na, a hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua! ua ofati oia i te fana, e ua tapǔpǔ i te mahae, e ua tahuhia te mau pereoo tamaˈi ra i te auahi.”—Salamo 46:8, 9.
[Faaiteraa i te fatu o te hohoˈa i te api 32]
Clock: By Courtesy of the Imperial War Museum