‘Eiaha e tiahi ia ratou!’

“IA HAERE noa mai te hoê Ite no Iehova, e peneiaˈe e piti, i to outou fare, eiaha e tiahi ia raua!” o ta te vea ra Corriere della Sera ïa e faaite ra. Te faahiti ra teie vea i te hoê ohipa i tupu i Treviso, i te pae apatoerau no Italia, i reira ua fatata roa te hoê taata tapihoo i te erehia hau atu i te hoê mirioni moni italia (hau atu i te 600 dala marite), no to ˈna tiahiraa e piti Ite o tei haere mai e farerei ia ˈna.

Te faatia ra teie vea e, ua tia ˈtu e piti Ite i mua i teie taata e ua na ô atu e: “E mahana maitai teie no oe. E Ite no Iehova mâua, e e taoˈa faufaa roa ta mâua na oe.” I reira, ua tamau atura teie taata farii ore i to ˈna opani, ma te ore e vaiiho ia raua ia faaoti i ta raua parau.

Ahiri taua taata nei i faaroo, e ite ïa oia e ua haere mai na Ite i to ˈna fare no te faahoˈi mai i ta ˈna pute moni, o ta raua i ite mai i nia i te hoê parahiraa i roto i te hoê aua faafaaearaa. Aita ˈtu ravea ta teie nau Ite maoti râ te afairaa ˈtu i teie pute moni e te mau taoˈa atoa i roto, i te fare mutoi fatata roa ˈˈe. I te mahana i muri iho, ua faahoˈi atu te mau mutoi i te pute moni i to ˈna fatu.

“Ahiri e taata ê i teie na [Ite] tei ore i fariihia,” o ta te vea ra Il Gazzettino di Treviso ïa i faaite, “eita e ore e . . . e tapea oia i te tino moni rahi e vai ra i roto i te pute. Eita râ te mau Ite no Iehova e na reira, inaha e feia haerea tia roa ratou.”

Eaha te tumu o te “haerea tia roa” o te mau Ite no Iehova? O to ratou ïa here i te Atua e i to ratou taata-tupu, ia au maite i te mau haapiiraa a Iesu Mesia. (Mataio 22:37-39) No reira atoa te mau Ite no Iehova e haere ai na te mau fare e faaite i te parau apî maitai no nia i te “fenua apî” faahiahia i tǎpǔhia mai e te Atua ra o Iehova. Mea hau aˈe teie poroi no te tiaturiraa i te faufaa, i te tahi noa ˈˈe taoˈa materia!—Petero 2, 3:13.