Te tatarahapa nei te hoê haava tahito—45 matahiti i muri iho
I ROTO i te hoê piha haavaraa i Berlin, i te avaˈe Atete 1995, ua faaite te hoê haava o te Tiribuna Teitei i te hoê o te mau Ite no Iehova i to ˈna tatarahapa no te hoê hape i ravehia e ana e 45 matahiti na mua ˈˈe.
I te avaˈe Atopa 1950, ua pari te Tiribuna Teitei no te Repubilita Manahune Helemani (RMH) i na Ite no Iehova e iva e ua rave ratou i te ohipa faahuehue e te ohipa mutoi huna. Ua faautuahia e piti i te utua fare auri no te oraraa taatoa, e te tahi pae e hitu ïa—to roto atoa o Lothar Hörnig e 22 matahiti, te maha o te taata i parihia i te pae atau o te hohoˈa—ua horoahia ïa i te utua fare tapearaa maoro.
Maha ahuru matahiti i muri iho, ua riro mai te RMH ei tuhaa no te Repubilita a te Hau no Helemani. Ua titorotoro te mau taata toroa a te hau vetahi o te mau ohipa tia ore i ravehia i roto i te RMH tahito e ua tamatahia e tuu taua mau tia ra i mua i te haavaraa. Te hoê o teie ohipa tia ore, o te hoê ïa haavaraa a te Tiribuna Teitei i te mau Ite i te matahiti 1950.
O A. T., e 80 matahiti i teie nei, te hoê o na haava e toru i te taime a tuuhia ˈi na Ite e iva i mua i te haavaraa. I teie nei ua faahapahia o ˈna i te fariu-ê-raa i te parau-tia, ua tia oia i mua i te Tiribuna Mataeinaa i Berlin no te faataa i ta ˈna faaotiraa.
I roto i ta ˈna faataaraa i te tiribuna, ua farii te haava tahito e ua maiti oia i te hoê faaotiraa faautuaraa e 45 matahiti na mua ˈtu, teie râ ua horoa oia i te mau utua etaeta rii. Ua faahaamanaˈo faahou râ te tupuraa ia ˈna. No te aha? Ua hamani-ino-hia te mau Ite no Iehova e te mau Nazi i roto i te Piti o te Tamaˈi Rahi no te mea ua patoi ratou i te turu ia Hitler. I muri aˈe i te tamaˈi, i taua tau ra ua hamani-ino-faahou-hia te mau Ite no Iehova e te faatereraa Communiste. Ua faatupu te reira i te “hepohepo rahi” o te haava.
Ua parau o Lothar Hörnig i te tiribuna e ua faaea oia e pae matahiti e te afa i roto i te hoê piha tapearaa o ˈna anaˈe e aita oia i matara mai roto mai i te fare tapearaa no Brandeburg e tae atu i te matahiti 1959. I muri aˈe i to ˈna faarooraa i te parau a Hörnig, ua taˈi te haava tahito. “Te tatarahapa nei au,” o ta ˈna ïa i parau ma te taˈi. “A farii mai i to ˈu tatarahapa.” Ua farii o Hörnig i te faaiteraa tatarahapa.—A faaau e te Luka 23:34.
[Faaiteraa i te fatu o te hohoˈa i te api 32]
Neue Berliner Illustrierte