Eiaha e tapea i te inoino

E AU ra e mea fifi roa ia ore e inoino ia faaino mai te hoê taata ia tatou. E aˈoraa ohie mau ta te Bibilia no taua mau huru tupuraa ra. “E ia riri outou ra,” ta te aposetolo Paulo i papai, “eiaha ia harahia; eiaha ia mairi te mahana i to outou ririraa.”—Ephesia 4:26.

Ia faaino te hoê taata ia tatou, e mea tano i te natura ia riri atu tatou. I to Paulo parauraa e “ia riri outou ra” ua hinaaro oia e parau e mea tano te riri i te tahi taime—peneiaˈe i mua i te hoê huru raveraa tia ore aore ra te hoê haavaraa hape. (A faaau e te Korinetia 2, 11:29.) Ia ore anaˈe râ te reira e faatitiaifarohia, e faatupu atoa te riri tano i te mau faahopearaa ino mau, o te aratai i te hara rahi. (Genese 34:1-31; 49:5-7; Salamo 106:32, 33) No reira, eaha ta outou e nehenehe e rave ia riri anaˈe outou?

I roto i te rahiraa o te mau tupuraa e tae noa ˈtu te mau hara haihai, e nehenehe outou e faatitiaifaro i te huru tupuraa i roto i to outou mafatu e “a faaea noa ˈi” aore ra e haafatata ˈtu i te taata tei hara i nia ia outou e e paraparau atu no nia i te reira. (Salamo 4:4; Mataio 5:23, 24) Aore ra te tahi atu ravea, mea maitai aˈe ia faatitiaifaro oioi outou i te reira ia ore te inoino e rahi roa ˈtu â e ia faatupu i te tahi mau faahopearaa peapea mau.—Ephesia 4:31.

Te faaore ohie nei Iehova i ta tatou mau hara, e tae noa ˈtu i te mau hara o ta tatou e rave ra e aita râ tatou i ite. Eita anei tatou e faaore atoa i te hara haihai a te hoê taata?—Kolosa 3:13; Petero 1, 4:8.

Ma te anaanatae, teie te auraa mau o te taˈo heleni ra “faaore i te hara” oia hoi “faaoromai.” No te faaore i te hara eita ïa tatou e faaiti aore ra e imi i te hoê otoheraa no te hape. I te tahi taime teie ïa te titau-noa-hia oia hoi ia faaoromai i te huru tupuraa, ma te ite e e faarahi â te tapearaa i te inoino i ta tatou hopoia e e haafifi te reira i te auhoêraa o te amuiraa kerisetiano. Hau atu, mea ino te tapearaa i te inoino no to outou oraora-maitai-raa!—Salamo 103:9.