Te na reira ra ratou no te here
TE FAAAMU ra te hoê vahine ivi haapao maitai e te farii popou i Kanada e maha tamahine apî mai te kerisetiano mau. Ua tapao te mau matahiapo o te amuiraa e e tia ia tataihia to ˈna fare. Aita ta ˈna e moni e e ravea no te raveraa i te reira. No reira ia au maite i te faaueraa tumu i horoahia i roto i te Timoteo 1, 5:9, 10, ua faanaho omoe te mau matahiapo e ia ravehia taua ohipa na ˈna ra. Nafea?
Ua ravehia te tahi mau faanahoraa e ia haere te vahine ivi e ta ˈna nau tamarii i rapae i te roaraa e pae mahana. Ua hau atu i te 80 taata o te amuiraa o tei horoa i te tauturu, te taoˈa materia, te moni, e to ratou taime ma te mafatu taatoa. I te taime iho a reva ˈi te utuafare, ua haaputu vave maira te mau rave ohipa aau tae i te utuafare mai te mau manu meli ra. Ua tataihia te taatoaraa o te rapaeauraa o te fare. Ua tataihia e ua penihia te mau papai. Ua haamaninahia e ua pate-faahou-hia te tahua. Ua tapirihia te refarefa e te tapoˈi tahua apî. Ua tamaumauhia te mau niuniu uira e te mau mori atoa e titauhia. Ua taui-atoa-hia te mau tauihaa tahito. Ua faaapî-roa-hia te fare i roto e pae mahana noa!
Ua huti te oaoa e te ohipa i te ara-maite-raa o te feia tapiri. No te putapû rahi o te hoê taata tapiri e 80 matahiti no te mau tutavaraa a te mau Ite, ua rave oia i ta ˈna parai peni e ua onoono atu e e tauturu ia ratou. Ua pûpû te paoti ohipa o te hoê rima tauturu i te hoê matini faaote auauahi no te umu. Ua horoa te tahi atu paoti ohipa i te mau afata vairaa tauihaa apî no te vahi utuuturaa maa. No te maere rahi o te hoê taata, ua hinaaro roa o ˈna e haapii hau atu â no nia i te mau Ite no Iehova. Ua farii oia ma te anaanatae mau i te buka ra E nehenehe oe e ora e a muri noa ˈtu i roto i te paradaiso i nia i te fenua nei.
Ua hitimahuta roa te vahine ivi e ta ˈna nau tamahine i to ratou hoˈiraa ˈtu i te fare. Ua taˈi, ua ata, e ua tauahi—hoê taime o te ore e moehia no nia i te here e te horuhoru kerisetiano. Oia mau, ua riro te here mau e te tâuˈaraa i te mau melo o te amuiraa i roto i te hiaai ei tapao no te kerisetianoraa mau, i te mea e ua papai o Paulo e: “E teie nei, te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo ra.”—Galatia 6:10.