Eaha ta te hiˈo e faaite ra?
A HIPA na i roto i te hoê hiˈo. Eaha ta outou e ite ra? I te tahi taime, e faaite te hiparaa i roto i te hiˈo i te tahi hape au ore mau i nia iho i to outou tino e o ta outou e oaoa ra i te faaafaro hou a itehia ˈi te reira e vetahi ê.
Ua hau atu te Bibilia i te hoê hiˈo. E nehenehe te reira e tauturu ia tatou ia faatupu i te hoê manaˈo haavare ore no nia ia tatou iho, o te arai e ia manaˈo rahi roa—aore ra ma te iti roa—no nia i to tatou faufaaraa i mua i te aro o te Atua. (Mataio 10:29-31; Roma 12:3) Hau atu, e nehenehe te Bibilia e faaite i te mau hape i roto i ta tatou mau parau, ohipa, aore ra haerea te tia ia tatou ia faatitiaifaro. Ia tupu te reira, e haafaufaa ore anei outou i ta te hiˈo e faaite ra?
Te parau ra te taata papai bibilia ra o Iakobo e: “O te taata hoi i faaroo noa i te parau, e aore oia i rave, e au oia i te taata e hiˈo noa i to ˈna iho mata i roto i te hiˈo ra: te hiˈo ra hoi oia ia ˈna iho, e haere atura, aromoe noa ihora to ˈna huru ia ˈna iho i reira ra.”—Iakobo 1:23, 24.
I te taa-ê-raa, te faataa ra o Iakobo i te tahi atu taata, “o te hiˈo râ i roto i te ture tia roa o te tiamâ ra, ma te tamau maite.” (Iakobo 1:25) Te parau heleni e huri ra i te parau ra “hiˈo” oia hoi te auraa e te haafeferaa i pihai iho aore ra te piˈoraa i mua no te hiˈo. “Te titauhia ra hau atu â i te hoê noa hiˈoraa” ta te Theological Dictionary of the New Testament ïa e parau ra. Te horoa ra te parau i te manaˈo oia hoi te hoê maimi-maitai-raa i te hoê mea hunahia. “Te vai ra te hoê mea faufaa roa ta te taata hiˈo e hinaaro ra e ite, noa ˈtu e mea fifi paha no ˈna ia ite i te reira e ia taa oioi i te reira,” ta te taata tuatapapa bibilia ra o R. V. G. Tasker ïa e papai ra.
E hiˈopoa maite anei ïa outou ia outou iho i roto i te hiˈo o te Parau a te Atua e i muri iho e faaau anei ia au i te titauhia ra? Te na ô faahou ra o Iakobo e: “E ere oia i te taata e moina noa te parau ia faaroo ra, e taata rave râ oia i taua ohipa ra, e haamaitaihia ïa oia i ta ˈna ra raveraa.”—Iakobo 1:25.