Ta outou haapaoraa—E pahi anei o te ore roa e tia ia faaruehia?
TEI ROPU roa te hoê pahi i te hoê vero rahi. Tei mua te mau ihitai, o te tutava ra ma te taiâ i te faaora i to ratou pahi, i te hoê faaotiraa peapea mau: te faaea-noa-raa i nia iho aore ra te faarueraa i te pahi e te faaoraraa ia ratou iho. Ua ite anei outou e te faaohipahia ra teie hohoˈa riaria mau ei parabole no te tuatapapa i te parau no nia i te Atua?
Te faaau pinepine ra te feia tuatapapa i te parau no nia i te Atua, te feia haapii katolika iho â râ, i ta ratou haapaoraa i te hoê pahi o te faaruru nei i te hoê vero rahi. Te parau nei ratou e o teie pahi te ravea otahi roa no te ora, e o Iesu aore ra o Petero i te hôe no te faatere. Teie te tiaraa poto noa a te mau upoo faatere haapaoraa: ‘Eiaha roa ˈtu e faarue i te pahi. Ua faaruru na te ekalesia i te mau fifi ino mau, tera râ e pahi teie o tei ora mai i te mau vero atoa o te Aamu.’ Te parau nei vetahi e, ‘No te aha e faarue ai ia ˈna? Eaha te maitiraa e vai ra? No te aha e ore ai e faaea e e tauturu ia ˈna ia haere i roto i te mau pape manino?’
Ia au i teie mau faatiaraa parau taipe, te feruri nei e rave rahi taata i roto i te mau huru haapaoraa atoa e, ‘Ua ite au e mea hape ta ˈu haapaoraa i roto e rave rahi mau tuhaa, tera râ te tiaturi nei au e e taui te reira i te hoê mahana. Aita vau e hinaaro e faarue ia ˈna. Te hinaaro ra vau e tauturu ia ˈna ia faatitiaifaro i ta ˈna mau fifi.’ Te arataihia ra teie huru haaferuriraa e te hoê here rotahi no te hoê o te mau haapaoraa tupuna aore ra atoa e te mǎtaˈu i te “haavare atu” ia ˈna.
Te hiˈoraa tano maitai no Hans Küng ïa, te hoê taata katolika tuatapapa i te parau no nia i te Atua matau-maitai-hia e ere râ oia no te Ekalesia o te fenua, o tei moemoeâ e: “E faarue anei au i te pahi i roto i te vero rahi, ma te vaiiho atu i te feia na muri ia vai to ˈu ratereraa tae roa i teie nei no te faaruru i te vero, no te aaro i te pape, e peneiaˈe e aro no te ora mai?” Ua pahono mai oia e: “Eita vau e faarue i to ˈu aravihi i roto i te ekalesia.” Te tahi atu maitiraa o te “faataa-ê-raa e taua ekalesia ra, no ta ˈna mau ohipa tia ore, no te mea e te here nei tatou i te mau faufaa teitei roa, e peneiaˈe no te riro mai ei kerisetiano mau.”—Die Hoffnung bewahren.
E nehenehe râ anei te hoê taata e faaea noa i nia i te pahi o ta ˈna iho haapaoraa ma te manaˈo e, na roto i te aroha rahi o te Atua, e faatia oia i te mau haapaoraa atoa e ia taui ratou i roto i te hoê tau taotia-ore-hia? E uiraa faufaa mau teie. Mai tei faaitehia i roto i te hohoˈa, te faarue-oioi-raa i te hoê pahi e fifi ra na roto i te raveraa i te hoê poti iti no te faaora mea atâta roa ˈtu â i te faaea-noa-raa i nia i te pahi o te tomo ra. E huru paari anei ia faaea i roto i te hoê haapaoraa noa ˈtu eaha te haamâuˈaraa, noa ˈtu eaha to ˈna huru? Eaha te mau huru tauiraa ta te mau haapaoraa i teie nei mahana e pûpû nei? E faatia noa anei te Atua ia vai mai ratou ehia roaraa tau no te patoi i to ˈna hinaaro?
[Faaiteraa i te fatu o te hohoˈa i te api 3]
Chesnot/Sipa Press