Aberahama—Tanuhia i ǒ nei, e te ora noa ra?

I te mau senekele atoa, ua haere mai te mau ati Iuda, te mau Mahometa, e te mau Kerisetiano e mataitai i teie vahi.

E nehenehe outou e haere e mataitai i te reira i te oire tahito no Heberona, i Ierusalema Apatoa. Ua piihia taua paturaa ra Haram el-Khalil e te Menema o te mau Patereareha. Oia, ua farii-rahi-hia te reira ei vahi hunaraa o te mau patereareha ra o Aberahama, Isaaka, e Iakoba, e ta ratou atoa mau vahine ra o Sara, Rebeka, e Lea.

Te faahaamanaˈo ra te Bibilia e i te poheraa ta ˈna vahine herehia o Sara, ua hoo mai o Aberahama te hoê ana ei vahi hunaraa e te tahi fenua i Makapela, i pihai iho ia Heberona. (Genese 23:2-20) I muri iho, ua huna-atoa-hia o Aberahama i reira, e te tahi atu mau melo o te utuafare. Tau senekele i muri iho, ua patu o Heroda Rahi i te hoê fare tahua teitei i pihai iho i te vahi hunaraa o tei tauihia e tei faarahihia, i te taime tano ra, e te feia upootia, ei faaiteraa i ta ratou iho mau tiaturiraa i te pae faaroo.

I te uputa, e ite outou e ono patu aore ra mau menema taata ore. Te hoê no Isaaka ïa, te tamaiti a Aberahama. I pihai iho te vai ra te mau apoo, e na reira ia haere i raro. Ua ite te feia maimi i te mau piha e mau ivi anaˈe to roto.

E no Aberahama ïa? Mai te peu e ua hunahia oia i roto i te hoê ana i raro aˈe i teie vahi, e mea maoro ïa to ˈna poheraa, e ere anei? Te farii nei e rave rahi mau taata mataitai i te reira. Ua parau râ te hoê peropheta rahi aˈe ia Aberahama e i roto i te hoê auraa, te ora noa râ o Aberahama. Nafea ïa? E eaha ta te reira e ohipa mai i nia i to outou faaroo?

A taio na i te tumu parau “Te feia pohe herehia e outou—Teihea roa ratou?” (Api 3) Te faataa ra te reira eaha ta taua peropheta rahi ra i parau no nia i te vai-ora-noa-raa o Aberahama, e mea faufaa roa teie haamaramaramaraa no outou e no to outou utuafare.