I te hoê â taime e ahuru matahiti i teie nei

I TE aniraahia eaha to ˈna huru, ahuru matahiti i mairi i te pia-matamua-raahia Te Pare Tiairaa na roto i te reo paniora i te hoê â taime e te vea reo beretane, ua pahono mai te hoê tuahine paniora herehia e: ‘Ua manaˈo matou e haamaitairaa te reira no te mea i teie nei tei roto matou, nafea outou ia parau i te reira, i te hoê â taahiraa avae e te reo beretane. Ia parau anaˈe vau te reo beretane, i te mau taime atoa e manaˈo vau i te faanahonahoraa a Iehova. E faariro matou i te faanahonahoraa mai te hoê “mama.” E auraa piri roa ïa. E mea nehenehe mau. E mea faahiahia mau e!’

Te faaite ra teie tuahine haapao maitai i te huru o te rahiraa o te feia taio e ere i te beretane. I te mau matahiti i mahemo, e itehia te mau tumu parau i roto i Te Pare Tiairaa reo paniora fatata e ono avaˈe i muri iho i te neneiraahia na roto i te reo beretane. Mai te reira atoa no te tahi atu â mau reo. Ma te taa maitai, te vai ra te hinaaro rahi i te nenei i te hoê â parau, i te hoê â taime, na roto e rave rahi reo.

Ma te haamata e te numera no te 1 no eperera 1984, o te vea paniora tei piahia i te hoê â taime e te vea beretane. Aita i maoro ua na reira-atoa-hia no te tahi atu mau reo. I te omuaraa o te matahiti 1985, ua piahia te mau vea na roto e 23 reo i te hoê â taime. I te iteraahia e te faaineineraahia te feia huri parau ua aifaito te mau vea na roto e rave rahi atu â reo i te vea beretane.

Na teie vea o Te Pare Tiairaa e tapao ra i te ahuru matahiti piaraa vea i te hoê â taime. I teie nei, te piahia ra Te Pare Tiairaa na roto 116 reo, e 85 i rotopu ia ratou i te hoê â ïa taime. Teie ïa te auraa e 99,3 i nia i te hanere o te taatoaraa o te mau 16 100 000 vea o Te Pare Tiairaa e hamanihia ra hoê â ïa api matamua e mau tumu parau. No tei tae i te mau haapiiraa a Te Pare Tiairaa i te mau hebedoma atoa, hau atu ïa i te 95 i nia i te hanere e tuatapapa ra i te hoê â parau i te hoê â taime.

Te piahia ra A ara mai na!, te apiti o Te Pare Tiairaa, i te hoê â taime na roto 37 reo i rotopu i na 74 reo. Te piahia ra Te buka matahiti a te mau Ite no Iehova (farani) na roto 18 reo. E tahoê teie mau buka e mau vea piahia i te hoê â taime i te nunaa a te Atua “ma te aau hoê e te manaˈo hoê.”—Korinetia 1, 1:10.