E haere anei i nia i te raˈi aore ra i roto i te po auahi?

“EAHA te manuïaraa ia haere outou i nia i te raˈi aore ra i roto i te po auahi?”

A tahi roa, ua uihia teie uiraa i te hoê pǔpǔ feia Marite i roto i te hoê uiuiraa manaˈo i ravehia aita i maoro aˈenei. Ua nenei te Pu maimiraa a te Fare haapiiraa tuatoru Princeton i te pae no te haapaoraa, i te mau faahopearaa i noaa mai i roto i te vea Haapaoraa i Marite 1992-1993 (beretane).

Eaha ta outou e pahono? Eaha te manuïaraa ia haere atu to outou hoa faaipoipo aore ra te tahi atu feia herehia e outou i nia i te raˈi ia pohe anaˈe ratou? Te manaˈo ra anei outou e e nehenehe o outou, aore ra o ratou, e haere atu i roto i te po auahi?

Ua faaite mai te uiuiraa manaˈo e e 78 i nia i te hanere o tei manaˈo e mea maitai aore ra mea maitai roa te manuïaraa e haere i nia i te raˈi, hau atu i te numera o tei pahono mai te reira tau 40 matahiti i teie nei. E te po auahi? Tau 77 i nia i te hanere o tei parau e mea iti te manuïaraa e ia haere atu ratou i reira.

Ua niuhia anei ta ratou mau pahonoraa i nia i te ite papu o te Bibilia? Tau 4 i nia i te 10 o tei farii e mea iti aˈe ratou i te haere i te pure i ta ratou i matau na e pae matahiti na mua ˈtu. E 28 anaˈe i nia i te hanere o tei parau e te apiti ra ratou i roto i te mau pǔpǔ haapii i te Bibilia e e 27 i nia i te hanere i roto i te mau pǔpǔ haapiiraa faaroo.

Mai te peu e e tuatapapa maite outou i te Bibilia, e ite ïa outou i te tahi mau ohipa maere mau. Ei hiˈoraa, te faaite papu ra te Bibilia e i to ˈna poheraa, ua haere o Iesu i roto i te “po auahi,” mai ta vetahi mau tatararaa a te Bibilia e huri ra. (Ohipa 2:31, King James Version; “Hades,” Tatararaa a te ao apî) Te haapapu atoa ra te Parau a te Atua e aita te Arii ra o Davida e aita atoa o Ioane Bapetizo i haere i nia i te raˈi i to raua poheraa. (Mataio 11:11; Ohipa 2:29) E mau ohipa papu teie, e ere noa i te tahi mau manaˈo i noaa mai na roto i te hoê uiuiraa manaˈo faaroo.

E riro vetahi atu mau ohipa i te haaferuri ia outou: Te haapii ra Bibilia e e afaihia te mau aposetolo a Iesu e te hoê numera taata taotiahia i nia i te raˈi no te faatere e o Iesu. Teie râ, ua haere noa ˈtu te pae rahi o te feia o tei pohe i te menema matauhia e te huitaata nei. E faatia faahou mai te Atua ia ratou, ma te faaora mai hoi ia ratou i nia i te fenua maoti te tiaturiraa e ora ma te mâha, te oaoa, e te mure ore i roto i te hoê paradaiso e haamau-faahou-hia i nia i te fenua nei.

E oaoa roa te mau Ite no Iehova i te tauturu ia outou ia haamau i te niu papu no teie tiaturiraa i roto i ta outou iho Bibilia.