To ˈu riri aore ra to ˈu oraora-maitai-raa?

O VAI te ore e riri? E riri hoi tatou pauroa. I te tahi mau taime, e tano iho â ia riri i roto i te hoê faito. Tera râ, e ere anei e mea pinepine, aita to tatou riri (aore ra to ˈna uˈanaraa) i tano?

Te parau maira te Bibilia e: “Faarue i te tairoiro, eiaha te riri; eiaha to oe ra inoino ia tae roa i te rave i te parau ino ra.” (Salamo 37:8) E aˈoraa paari mau anei teie? E nehenehe anei oia e faaino i to tatou oraora-maitai-raa a muri aˈe?

I roto i ta ˈna tuhaa “Oraora-maitai-raa,” ua tapao te vea The New York Times e:

“Te feia e mea pinepine ratou i te riri taue noa aore ra i te parahi noa ma te iria no te tahi hapa rii atoa o ta ratou e ite, eita noa ïa ratou e riro ei feia au ore. E nehenehe atoa râ ratou e haapohe ia ratou iho.

“Ua haaputu mai te feia maimi e rave rahi mau haamaramaramaraa aita i maoro aˈenei e faaite ra e no te ino o te riri tamau i nia i te tino, tei nia oia i te hoê â faito, aore ra ua hau atu, i te puhipuhiraa avaava, te poria e te amuraa i te maa haaporia, ei tumu puai mau no te poheraa i te hoê faito matahiti apî.

“‘Te faaite ra ta matou mau maimiraa e, e tuea noa te riri uˈana e te inoino i te tahi atu mau maˈi atâta o ta matou i ite,’ o ta te taote Redford ïa i parau, e taata maimi oia i te pae no te rapaauraa i te haerea o te taata i te Fare maˈi a te Fare haapiiraa tuatoru Duke.”

Te faaite ra te mau maimiraa e te faatupu nei te feia e riri vave noa i mua i te mau fifi atoa o te oraraa, hau atu i te mau oromona o te hepohepo. E nehenehe to ratou mau riri pinepine e faatupu i te hoê aifaito-ore-raa i rotopu i te mau huru taoˈa cholesterol paruru e te mea ino, e e nehenehe ïa ratou e roohia i te maˈi mafatu.

E parau mai paha vetahi e, ‘Mai te reira iho â to ˈu huru’ aore ra ‘Tera to ˈu huru mai to ˈu nainairaa mai â.’ Noa ˈtu râ, e ere te auraa e eita ta outou e nehenehe e taui, na roto i te tamataraa ma te haavare ore i te faaohipa i te mau aˈoraa a te Atua. I roto i ta outou iho Bibilia, a hiˈopoa i ta ˈna mau aˈoraa no nia i te riri e te tairoiro i papaihia i roto i te Maseli 14:29, 30; 22:24, 25; Ephesia 4:26; Iakobo 1:19, 20.

E nehenehe te faaohiparaa i te paari a te Atua e haamaitai i to outou oraora-maitai-raa e e haamaoro atu â i to outou oraraa. Ua tapao te vea Times e: “E rave rahi mau taata maimi o tei parau e e nehenehe te feia riri vave noa e faaiti i te atâtaraa ia pohe oioi ratou na roto i te tauiraa i ta ratou huru patoitoi e te iria vave.”