Te mau kerisetiano beretane itoito mau
I roto i te vea The Economist, te itehia ra e fatata 10 i nia i te hanere o te mau 56 mirioni beretane e mau kerisetiano itoito mau. Ia tae i te mahana sabati, fatata e 4 mirioni taata o te haere nei i te pureraa. I nia i teie numera, 1,1 mirioni anaˈe iho e anglican ratou. Maoti te rahiraa o te feia tiaturi ore i te Atua, te tamau noa ra te Ekalesia beretane i ta ˈna tuhaa haamauhia ei haapaoraa no te hau. “Aita te Beretane i riro noa ei totaiete kerisetiano ehia rahiraa matahiti tera râ te patoi nei oia i te farii i te tiaturi-ore-raa i te Atua ei ohipa moemoe no te rahiraa,” ta taua noâ vea e parau nei. Te ani nei vetahi ia pii te feia politita no to tatou nei tau e te mau papai vea no te faaore-roa-raa i te haamauraa o te Ekalesia, te hoê ofatiraa i roto i te taairaa o te Ekalesia e te Hau.
“Hoê ao tahito, o te parauhia kerisetiano o te hoê o te mau ao ino roa ˈˈe, ta Walter Bagehot, te taata nenei i te The Economist no te senekele 19, i haapeapea. Tera râ, i te senekele matamua o to tatou nei tau, ua parau o Iesu Mesia e ‘e ere ta ˈna mau pǐpǐ no teie nei ao, mai ia ˈna hoi e ere i to teie nei ao.’ (Ioane 17:16) Tera râ, ua tono oia ia ratou i roto i te ao no te poro i te Basileia a te Atua. Hoê â huru atoa i teie nei mahana, ua matauhia i te mau Ite no Iehova no ta ratou pororaa ieie “i te vahi taata e i tera fare e tera fare.”—Ohipa 20:20.
Ia faaaauhia e te mau anglican, mea iti te numera o te mau Ite no Iehova oia hoi e 126 173 i te fenua Beretane. Te horoa nei ratou e 20 hora i te avaˈe no te haere atu i te mau putuputuraa kerisetiano. Hau atu, i te matahiti 1992 ua rave te Ite tataitahi i te hoê faito e 16 hora i te avaˈe no te faaite ia vetahi ê i te parau apî o te Basileia a te Atua, te faatereraa o te fatata roa i te haamau i te hoê ao apî parau-tia. (Mataio 24:14; Petero 2, 3:13) Ia haere mai anaˈe te mau Ite no Iehova e farerei ia outou i te fare i teie mau mahana i mua, e faaroo anei outou i ta ratou poroi taa ê mau no te ite eaha te turai nei ia ratou ia vai itoito noa?