Ua momi anei oia ia Iona?

TE FAAITE maira te Bibilia e ua paiuma o Iona, te hoê peropheta a Iehova i te senekele iva hou to tatou nei tau, o tei horo i ta ˈna hopoia, i nia i te hoê pahi. I roto i te tere vero i nia i te miti Mediteranea, ua taue te feia ihitai ia ˈna i roto i te miti. “Ua haapaohia e Iehova te iˈa rahi ei horomii ia Iona. E i roto hoi Iona i te opu o taua iˈa ra e e toru rui, e toru hoi ao.”—Iona 1:3-17.

Te parau nei vetahi e, ‘Eita e nehenehe! Aita te hoê animala i roto i te miti o te nehenehe e momi i te hoê taata.’ Teie râ, e nehenehe te hoê tohora hinu aore ra te hoê maˈo uouo rahi. Ua faataa te vea National Geographic (titema 1992) i te tahi atu ravea—te maˈo tohora. O ˈna te maˈo rahi roa ˈˈe i itehia, e naeahia e 20 metera te roa e e 70 tane te teiaha.

“Te turu nei te hamaniraa taa ê o te tereraa maa o te maˈo tohora i te mau aamu a Iona. Mea ohie ia feruri e e momi-hape-hia ˈtu outou i roto i te vaha o te hoê maˈo tohora, e vaha iti rahi . . . E nehenehe hoi e piti Iona e ô i roto te vaha hohonu o te hoê maˈo tohora nainai tei naeahia i to ˈna faito paari.”

Te amu nei te maˈo tohora i te mau huˈa plankton e te krill, o te “hee atu na roto i te haereraa maa e tae roa ˈtu i roto i taua area rahi e te uaua ra, oia hoi te uputa vairaa maa.” Teie râ, nafea te hoê taata e faura faahou mai ai i rapae? Te na ô ra te National Geographic e: “Mea mǎrû roa te mau maˈo ia haapae i te mau taoˈa rarahi o ta ratou e momi o te ore e tahe i roto i to ratou vairaa maa . . . E nehenehe ta te hoê maˈo e haapau mǎrû noa i to ˈna vairaa maa na roto i te taviriviriraa e te turairaa ˈtu na roto i te vaha. . . . No reira e nehenehe outou e haere mai i rapae na roto i te heeraa na nia iho i te hoê tapoˈi haaˈe, ma te pararai aˈe, ua haapii mai râ outou i te tahi mea.”

I teie mahana, aita te mau maˈo tohora e vai ra i roto i te miti Mediteranea, noa ˈtu e ua itehia mai ratou i te pae apatoerau roa mai te oire ra no New York. Ua ora anei ratou i roto i te miti Mediteranea i te tau o Iona ra? O vai tei ite? Aita te Bibilia e faaite ra e eaha te animala o te miti ta Iehova i faaohipa, tera râ, ua haapapu o Iesu iho e e parau mau te aamu a Iona.—Mataio 12:39, 40.

[Faaiteraa i te fatu o te hohoˈa i te api 32]

Norbert Wu/Peter Arnold Inc.