“Aita mâua e paraparau ra!”
E TIA ia Michael, e auvaha paruru oia, ia aravihi i te paraparauraa. Tera hoi ta ˈna ohipa. Teie râ, i muri aˈe e 16 matahiti faaipoiporaa, ua tia ia Michael ia farii e ia hoˈi anaˈe oia i te fare i ta ˈna vahine ra o Adrian, e au ra e e moe taue noa to ˈna aravihi no te paraparauraa. “Taora parau, faahapa, faaino,” o ta Michael ïa e haamanaˈo ra, “e tatamaˈi noa mâua Adrian, e ua manaˈo vau e e rohirohi roa mâua i teie huru tupuraa. Ua aniani au mai te peu e tera anei te faaipoiporaa, te vai pue hopea ore o te mauruuru ore e te feii. Mai te peu e tera aˈe te huru o te toea o to mâua oraraa faaipoipo, mea au aˈe na ˈu ia faaatea—e ere i te parau hauti. Eita ta ˈu e nehenehe e faaruru e 20, e 30, e 40 atu matahiti o teie huru faainoraa e te peapea hau ore.”
E ere o Michael e o Adrian anaˈe teie e faaruru nei i teie mau manaˈo mai teie te huru. Mai te reira hoi no te mau taata faaipoipo e rave rahi o te tatamaˈi nei e i muri iho o te faahau nei i to raua peapea. E hope te mau tauaparauraa haihai roa na roto i te mau taoraraa parau. E “faaroo” raua i te mau parau o tei ore hoi i faahitihia. E parau raua i te mau mea o ta raua e ore e manaˈo mau ra. E patia raua e e pari raua i te tahi e te tahi, e i muri iho, e fariu ê raua ma te faariri mamû noa. Aita raua i faataa, tera râ, e ere faahou raua “ei hoê.” (Genese 2:24) Aita to raua e hororaa. Ia hoˈi raua i muri, e faataa ïa raua; ia haere raua i mua, e tia ïa ia raua ia faaruru tia ˈtu i te mau taa-ê-raa. No te ape i te mauiui o teie na ravea e piti, te maiti nei teie mau hoa faaipoipo i te faaatea ê i te tahi e te tahi no te paruru ia raua iho.
E tia i teie mau taata faaipoipo ia ‘noaa i te aratairaa aravihi’ i roto i to ratou faaipoiporaa. (Maseli 1:5) Te vai ra teie aratairaa i roto i te Parau a te Atua, te Bibilia. Te haapapu ra te piti o te rata a Paulo ia Timoteo e ua riro te Bibilia ei “mea maitai ei haapiiraa, ei aˈoraa, ei faaiteraa hapa.” (Timoteo 2, 3:16) O tei itehia ïa i roto i te faatitiaifaroraa i te toparaa o te mau taairaa i roto i te faaipoiporaa, mai ta tatou e ite atu.