Ua faataere ratou, e ua pohe ratou!
E TORU utuafare, e hitu taata paari e e ono tamarii, o tei horo ma to ratou puai atoa no te imi i te ora. E au ra e ua horo atu ratou e tapuni i roto i te fare o te hoê taata, ma te tiaturi e e ora mai ratou i te mau ofai e topatopa ra. Teie râ, a mǎrû ai te haruru o te mau ofai e topa ra, ua fa maira te hoê ati riaria apî—te hoê ata ereere rehu meumeu. I teie nei, aita ˈtu ïa e ravea maoti ra te hororaa.
I mua roa, te vai ra te hoê tane, peneiaˈe te hoê tavini, o tei horo e ta ˈna pute maa i nia i to ˈna tapono. Ua apeehia oia e e piti tamaroa, hoê e maha matahiti, te tahi e pae, e horo ra ma te tapea i to raua rima. Tei muri mai te toea—ua mehameha roa, te ru noa ra, ma te peretete haere, te imi ra ma to ratou puai atoa ia ora ratou. Te tamata ra ratou i te huti i te aho, teie râ, maoti i te mataˈi, o te rehu rarirari o ta ratou e huti ra. Te tahi i muri aˈe i te tahi, ua topa ˈtura ratou 13 atoa ra e ua tarava noa ˈtura ma te hauti ore e ua tapoˈi-roa-hia ratou i te ûa rehu. E vai moe noa to ratou mau tino pohe e tae roa ˈtu i te taime a heru ai te feia ihipǎpǎ ia ratou tau 2 000 matahiti i muri iho e ua itehia mai te aamu taatoa o to ratou mau taime hopea.
Tei roto hoi teie na 13 feia pohe i te rahiraa e 16 000 tei manaˈohia e ua pohe i roto i te oire tahito no Pompei, i Italia, i te 24 no atete 79 o to tatou nei tau. E rave rahi o tei ora mai i to ratou hororaa i rapae i te oire i te paainaraa matamua o te Mouˈa Vesuve. Teie râ, ua tapoˈihia te feia o tei faataere—te rahiraa, e feia moni ïa o tei ore i hinaaro e faarue i to ratou fare e ta ratou mau faufaa—i raro aˈe e 6 metera ofai e te rehu.
E aamu tahito noa paha te ati i tupu i Pompei tau 2 000 matahiti i teie nei. Teie râ, i roto e rave rahi mau tuhaa, e nehenehe te reira e faaauhia i te huru tupuraa e farereihia ra e te taatoaraa o te fetii taata nei i teie mahana. Ua riro te hoê tapao rahi, riaria roa ˈtu â i te mau harururaa a te Mouˈa Vesuve, ei faaararaa e te piri atura teie nei ao i to ˈna haamouraa. No te ora, e tia ia tatou ia ohipa oioi noa. Ia faataere tatou, e pohe tatou. Eaha taua tapao ra e nafea tatou ia ohipa ma te paari, o te tuhaa ïa e tuatapapahia i roto i te tumu parau i muri nei.
[Faaiteraa i te fatu o te hohoˈa i te api 2]
Hohoˈa o te api rapaeau a te National Park Service
[Faaiteraa i te fatu o te hohoˈa i te api 3]
Soprintendenza Archeologica di Pompei