O tei tia vave

I ROTOPU i te mau tumu raau hotu o te pae Mediteranea, o te tumu sekadi te mea maere roa ˈˈe. I te hopea o te avaˈe tenuare aore ra febuare—na mua roa ˈˈe i te rahiraa o te mau tumu raau—e ara mai oia i te hotu ore o te tau toetoe. Auê ïa araraa e! E î roa te tumu raau i te hoê pereue iti nehenehe uaa tarona aore ra uouo, e au hoi teie mau uaa uouo i te rouru hinahina o te hoê taata ruhiruhia.—A faaau e te Koheleta 12:5.

E pii na te mau Hebera tahito i te tumu sekadi o tei “tia vave,” no to ˈna hoi uaaraa oioi. Ua faaohipa Iehova i teie huru taa ê no te faahohoˈa i te hoê poroi faufaa roa. I te omuaraa o ta ˈna taviniraa, ua ite o Ieremia na roto i te hoê orama i te hoê ohi sekadi. Eaha ïa te auraa? Ua faataa maira o Iehova e: “E faatupu etaeta hoi au i ta ˈu nei parau.”—Ieremia 1:12.

Mai te tumu sekadi e ‘tia vave mai,’ mai te reira atoa Iehova i te “tia-vave-raa i te poipoi roa” i te hoê auraa taipe no te tono i ta ˈna mau peropheta ei faaararaa i to ˈna nunaa no nia i te mau faahopearaa o te faaroo ore. (Ieremia 7:25) E eita oia e faafaaea—e ‘vai ara noa oia’—e tae roa ˈtu i te taime a hope ai ta ˈna parau tohu i te tupu. E i te matahiti 607 hou tatou tau, i te taime faataahia, ua tupu te haavaraa a Iehova i nia i te nunaa apotata no Iuda.

Te tohu ra te Parau a te Atua e e tupu te hoê â haavaraa i nia i te faanahoraa ino o ta tatou e ora nei. (Salamo 37:9, 10; Petero 2, 3:10-13) No nia i teie ohipa haavaraa, te haapapu maira te peropheta o Habakuka e: “No te taime i haapaohia ra taua orama nei . . . e tiai atu â; e tae mau mai ïa, e ore e haamaoro hua.” (Habakuka 2:3) Te faahaamanaˈo maira te uaa sekadi nehenehe roa ia tatou e e vai ara noa Iehova i ta ˈna parau e ia tupu iho â.

[Faaiteraa i te fatu o te hohoˈa i te api 32]

Pictorial Archive (Near Eastern History) Est.