Te ootiraa a te hoê poro evanelia mau
UA HAERE o William R. Brown i Afirika no te taime matamua i te matahiti 1923. Na muri i ta ˈna vahine e ta raua tamarii, ua ‘rave oia i te ohipa a te hoê poro evanelia’ i Gambie, Ghana, Liberia, Nigeria, e Sierra Leone. (Timoteo 2, 4:5) Mea faahiahia mau te hotu o ta ˈna ohipa.
E ere teie taata tei fanauhia i Inidia Tooa o te râ i te melo no te hoê ekalesia a te amuiraa faaroo kerisetiano e aita roa ˈtu oia i faaô atu i roto i te ohipa politita. Maoti râ, ua pee oia i te hiˈoraa o Iesu e to te mau aposetolo na roto i te faaite-haere-raa i te iˈoa e te mana arii o Iehova, e te tuuraa i te tapao i nia i te faufaaraa o te hoo, e te pororaa i te parau apî maitai o te Basileia. (Mataio 9:35; 20:28; Ioane 17:4-6) Ua faaohipa o William R. Brown i te Bibilia i te mau taime atoa, ma te faariro ia ˈna ei mana teitei i roto i te mau tumu parau i te pae no te haapiiraa e te faaroo. (Timoteo 2, 3:16) No to ˈna onoono i nia i teie tuhaa, ua piihia ˈtura oia o Brown Bibilia.
Maoti te haamaitairaa a Iehova, ua faura mai e ua tupu roa te mau huero i ueuehia e Brown Bibilia. I teie mahana, i roto i te mau fenua i reira to ˈna iritiraa i te eˈa, fatata e 200 000 Afirika o tei pûpû i to ratou ora no to ratou Poiete, e i to ratou aˈe pae, te poro nei ratou i te parau apî maitai o te Basileia ia vetahi ê. (Mataio 24:14; Korinetia 1, 3:6-9) Ua matauhia teie mau kerisetiano itoito no to ratou haerea parau-tia e to ratou tiaraa tiaturihia. Te oaoa nei ratou i te riroraa ei mau Ite no Iehova e ei mau tavini no te Mesia, te Arii e faatere ra.
Ua riro teie ootiraa ei faahopearaa no te ohipa pororaa evanelia kerisetiano mau. Te ootihia ra teie huru auhune na te ao atoa nei i nia i te mau fenua atoa e orahia ra e te taata. I roto hau atu i te 200 fenua, hau atu i te maha mirioni mau tane e mau vahine aau rotahi o tei “ootihia” e o te parau atoa ˈtu nei ia vetahi ê i te mau parau a te melahi e evanelia ta ˈna: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra.” (Apokalupo 14:7) Oia mau, te ravea hoê roa e noaa mai ai te tiaturiraa i roto i teie anotau ahoaho to tatou, o te fariuraa ˈtu ïa i nia i te Atua e te auraroraa i to ˈna Basileia.