‘Te vahine o to apîraa ra’

“E OHIPA matauhia te faaturi i te mau mahana atoa.” O ta te feia maimi ïa i faaite, ia au i te vea Los Angeles Times. E maere anei outou i teie huru parau? Te faahiti ra te taote rapaau i te feruriraa ra o Frank Pittman e fatata e 50 % o te mau tane e i rotopu i te 30 % e te 40 % o te mau vahine o tei taiva i to ratou hoa. Mai te peu e ua tano teie mau numera, fatata te afaraa o te feia faaipoipohia atoa o te faaturi nei!

Te auraa anei ïa e mea tia iho â te peu taiata? Eita roa ˈtu! E ere no te mea e ua parare roa te taivaraa i to ˈna hoa, e peu maitai ïa te reira—hoê atoa huru, e ere no te mea e ua maraa te taparahiraa taata na roto i te mau aroâ, e mea tano ïa ia eiâ i te taata. E haamauiui te peu taiata. Ei hiˈoraa, te roohia nei te huitaata i teie mahana i te mau maˈi atâta roa e parare na roto i te mau taatiraa i te pae tino, o te nehenehe hoi e arai-ohie-hia mai te peu e e pee maite te taata i te hoê oraraa mâ i te pae morare. Eita te maˈi taparahi taata o te SIDA e naeahia i teie faito ahiri e aita te taata i haapao ore i to ratou haerea i te pae taatiraa.

Hau atu, e tae noa ˈtu te feia aravihi roa ˈˈe e te “maramarama” roa ˈˈe, e roo-atoa-hia ratou i te mauiui rahi ia taiva anaˈe to ratou hoa. E nehenehe te hoê anaˈe taivaraa e faatupu i te mau pepe o te titau i te afaraa o te hoê oraraa ia rapaauhia.

Te manaˈo faufaa roa ˈˈe râ, oia hoi, ua riro te ofatiraa i te euhe o te faaipoiporaa ei faatura-ore-raa ino mau i mua i te Atua, inaha o ˈna te Tumu o te faaipoiporaa. Te na ô ra te Bibilia e: “Ia haamaitaihia te faaipoiporaa i te taata atoa ra, e te viivii ore hoi te roi.” Te faaara-atoa-hia ra tatou e: “E haava hoi te Atua i te poreneia e te faaturi ra.”—Hebera 13:4.

Te pee nei te feia paari i teie mau parau i faauruahia mai: “Ia oaoa oe i te vahine o te apîraa ra.” (Maseli 5:18) Te imi nei ratou i te mauruuru e te oaoa e to ratou hoa faaipoipo. Ia na reira ratou, te paruru nei ratou i to ratou maitairaa i te pae tino e i te pae no te here, e te mea faufaa roa ˈtu â, te faahanahana ra ratou i te Tumu o te faaipoiporaa, i te Atua ra o Iehova.