Te taime no te imi i te Atua

TE HOHOˈA i nia i teie api, o te Acropole ïa no Ateno, tei riro na i mutaa ihora ei pu no te haamoriraa i te mau atua e te mau ruahine e rave rau. I raro mai i te Acropole te vai ra te Areopago, tei parauhia e tei reira te hoê tiribuna no tahito ra. I teie nei vahi, fatata e 2 000 matahiti i teie nei, to te aposetolo Paulo tiaraa ˈtu e to ˈna vauvauraa i te hoê oreroraa parau faahiahia mau. Teie vetahi o ta ˈna mau parau i faahiti:

“E na [te Atua] i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei, e ua haapao i te tau i haapaohia i mutaa ihora, e te otia o to ratou ra parahiraa; ia imi ratou i te [Atua], peneiaˈe o te perehahu atu ratou ia ˈna e itea ˈtu, aita râ oia i atea ê atu ia tatou atoa nei: no ˈna hoi to tatou ora, e i hahaere ai, e i parahi ai hoi.”—Ohipa 17:26-28.

Auê te aamu i te taa ê e ahiri e ua haapao te huitaata nei i te mau parau a Paulo! Ehia rahiraa tamaˈi e te mau ati o te apehia ahiri e ua farii te mau taata e mea hau aˈe no ratou ia tahoê ei huaai no te taata hoê i poietehia e te Fatu Teitei ra o Iehova.

I teie mahana, te amahamaha nei te huitaata na roto i te here aiˈa, te mau taa-ê-raa i rotopu i te mau pǔpǔ taata, te mau feiiraa i te pae no te iri, e te mau aifaito-ore-raa i te pae totiale. Te tano noa nei râ te mau parau a Paulo. No roto paatoa mai tatou i te huaai o taua taata i poietehia ra e te Atua. Ua riro tatou paatoa ei mau taeae e mau tuahine i roto i taua auraa ra. E aitâ i maoro roa no te imi i te Atua ia iteahia mai.

Mea faufaa roa ˈtu â te mau parau a Paulo ia hiˈo tatou i te mau parau faaotiraa o ta ˈna oreroraa parau. Te na ô ra oia e: “Ua haapaohia e [te Atua] te mahana e haava mai ai oia i to te ao atoa nei ma te parau-tia, i te taata i haapaohia e ana ra, o ta ˈna i faaite hua mai i te taata atoa nei, oia i faatia faahou mai ia ˈna mai te pohe maira.”

Ua riro te tia-faahou-raa o Iesu ei tupuraa papu o te aamu, e mai ta Paulo e faaite ra, ua riro te reira ei haapapuraa e e tupu te hoê mahana haavaraa no te mau taata. Afea? Ua ite tatou e fatata e 2 000 matahiti tei mairi i muri aˈe i to Paulo tiaraa ˈtu i te Areopago e to ˈna faahitiraa i teie mau parau. Oia mau, te faaite ra te tupuraa o te parau tohu bibilia e ua fatata roa mai taua taime ra. E manaˈo papu mau te reira! Mea ru mau â ia imi tatou i te Atua ma te aau rotahi, mai ta Paulo i parau atu i to Ateno, “te aˈo mai nei oia i te taata atoa e tatarahapa”!—Ohipa 17:30, 31.