Te feia no Gibeona—Ua imi ratou i te hau
TE PARAUHIA ra e tei nia te oire aivi i nia nei i te vahi i reira te tiaraa o Gibeona tahito, tau 10 kilometera i te pae apatoerau no Ierusalema.
Ua ite paha outou e ua faahitihia o Gibeona i muri aˈe i to Iosua aratairaa ia Iseraela i roto i te Fenua i tǎpǔhia e to ˈna upootiaraa i nia ia Ieriko. Ua taa ˈtura i te mau ati Kanaana no Gibeona e eita ratou e mau i mua ia Iseraela, o tei turuhia hoi e te Atua. Eaha ïa ta ratou e rave? Na roto i te tahi ravea haavarevare, ua tono atura to Gibeona i te mau auvaha o tei tia ˈtu ei feia ratere no ǒ mai i te hoê fenua atea. Ua manuïa teie tutavaraa no te imi i te hau, inaha, ua fafau ihora o Iseraela i te tahi faufaa e o ratou. I te taime a itehia ˈi ta ratou ravea haavare, ua riro maira te mau Gibeona ei feia haaputu vahie e ei feia afai pape.
Aita te Atua i au ore i taua nunaa o tei imi i te hau ra. Ua turu oia i te aroraa a Iosua no te paruru i to Gibeona a tamaˈi mai ai e pae arii ia ratou. Ua rave atoa Iehova i te hoê semeio na roto i te faataimeraa i te mahana no taua tamaˈi ra.—Iosua 9:3-27; 10:1-14.
Ua itehia mai e te feia heru fenua i nia i teie haapueraa iti i te hoê apoo hohonu, tei taraihia i roto i te ofai. E nehenehe to Gibeona e pou atu na nia i te tahi eˈa i roto i teie apoo e e rave mai i te pape i roto i te hoê piha i raro i te fenua. Teie anei “te pape i Gibeona ra” tei faahitihia i roto i te Samuela 2, 2:13? Ua ite atoa mai te feia ihipǎpǎ i te tahi mau piha i taraihia i roto i te ofai e te tahi mau tauihaa hamaniraa uaina. Oia mau, e au ra e ua riro o Gibeona ei pu hamaniraa uaina.
I te tau o Davida ra, tei reira te tiahapa, oia hoi te sekene, o te Atua mau. Ua haere mai te Arii ra o Solomona i reira no te pûpû i te tusia. Ua fa mai o Iehova ia Solomona na roto i te hoê moemoeâ e ua tǎpǔ atu oia ia ˈna i “te aau haapao e te ite i te parau,” e tae noa ˈtu i te taoˈa faufaa. (Te mau arii 1, 3:4-14; Paraleipomeno 2, 1:3) Te faaite ra te tumu parau i te mau api 12-17 o teie vea e ua riro te huaai o te nunaa o tei parahi i ǒ nei i Gibeona ei feia haamaitai-taa-ê-hia i rotopu i te nunaa o te Atua i te tau i muri iho. Ua ite anei outou e mea nafea?
[Faaiteraa i te fatu o te hohoˈa i te api 32]
Pictorial Archive (Near Eastern History) Est.