Haapaoraa ‘faaroo faaau ohie noa’
“Ua riro te aravihi o te faaroo Momoni no te haere e parahi i roto i te mau hau demotaratia tiamâ e te mau totaiete haavî ei ohipa faahiahia roa.” O ta te vea The Wall Street Journal ïa i faaite i to te hau no Honegeria horoaraa i te tiamâraa taatoa i te Ekalesia a Iesu Mesia i te feia moˈa i te mau mahana hopea nei. Mea nafea te ekalesia i te naearaahia i teie tapao? Ia au i te Journal, “te tumu, e ere noa ïa te maraaraa o te fanauraa i rotopu i te mau Momoni aore ra te pororaa tuutuu ore i ta ratou evanelia. Area ra, o te huru faaau ohie noa o te faaroo.” Eaha ïa te auraa?
Ma te faahiti i te tau na mua ˈtu i te mau tauiraa politita apî i Europa Hitia o te râ, te na ô ra te Journal e: “Ma te faaohipa i te mau pǔpǔ hauti upaupa e te ori no ǒ mai i te Brigham Young University, ua faanaho te mau Momoni no te ape i te opaniraa e te etaeta e farereihia e te mau mitionare i roto i te rahiraa o te mau fenua communistes,” o ta te Journal ïa e faaite ra. Ua tere atu ta ratou mau pǔpǔ i Rumania, Tekolovakia, Honegeria, Polonia, Rusia, i te fenua Taina, e tae noa ˈtu i Arabia Saudite, Libia, Aiphiti, Ioridana, Somalia, e i Iseraela. Hau atu, “ua faaohipahia te faufaa a te Ekalesia Momoni ei ravea no te tomo atu i roto i te mau fenua marxiste e te mau fenua veve.” Te paturaa i te mau haapahuraa pape e te mau ǒraa apoo pape, o te tahi mau opuaraa ïa e turuhia ra e te mau ô a te mau Momoni.
I roto i te ao no teie nei tau e faatiatia nei i te navenave e te moni, eita e maerehia ia ume rahi te mau himene e te mau oriraa e tae noa ˈtu te turu i te pae moni i te manaˈo. (Timoteo 2, 3:2, 4) Teie râ, e faaroo te feia e au i te mamoe i te reo o te Tiai mamoe maitai, o Iesu Mesia. (Ioane 10:27) No reira ïa, i to ˈna faaueraa i te feia e apee ra ia ˈna ia “faariro i te mau fenua atoa ei pǐpǐ,” aita oia i parau atu e na reira na roto i te mau ravea atoa aore ra noa ˈtu eaha te haamâuˈaraa, area ra, ‘ma te haapii atu ia ratou i te haapao i te mau mea atoa ta ˈna i faaue.’ (Mataio 28:19, 20) No te faatupu i teie hopoia, eita roa ˈtu e tia ia ofati i te mau ture a te Bibilia.