Te hoê tere tauturu i tonohia i Ukraine

TE FAAHITI-RAHI-FAAHOU-HIA ra te mau parau peapea na roto i te mau ravea haapurororaa parau apî. Te tairi nei te huanane i te pae faanavairaa faufaa, te ereraa i te maa, e te poia, i te fenua—i teie nei taime i roto i te mau fenua o te Hau no Rusia tahito. Aita i maoro iho nei, ua ani te Tino Aratai a te mau Ite no Iehova i te amaa a te Taiete Watch Tower i Danemata ia rave i te tahi faanahoraa no te tauturu i te mau Ite e fifihia ra i Ukraine. Eaha ta te mau taeae no Danemata i rave?

Aita ratou i haamaoro! Ua tono oioi noa ˈtura te amaa i te mau taeae no te maimi i te mau vahi hooraa maa ia noaa mai i te mau hoo mama roa ˈˈe. Ua faaarahia te mau amuiraa atoa a te nunaa o Iehova i Danemata, ma te haapapu atu i te mea e titauhia ra. Te faaite ra te amaa e: “Ua oaoa roa te mau amuiraa atoa i te tauturu mai. Inaha, ua nehenehe atura matou e horoa i te hoê tapao haapapuraa no to matou aroha i te feia e erehia ra.” I taua taime ra, ua tono atu te amaa a te Taiete i Helemani e pae pereoo rarahi o tei horoa-noa-hia i Danemata. Ua tapae atu teie mau pereoo, e e piti pereoo ê atu e e 14 feia faahoro, i te amaa no Danemata i te mahana maa 7 no titema 1991. Ua faatomo te mau rave ohipa a te amaa i te mau pereoo e te maa o ta ratou i hoo mai.

I te avatea o te monire 9 no titema, ua reva ˈtura teie mau pereoo no te hoê tere roa na Europa e tae roa ˈtu i Ukraine. Te papai ra te amaa e: “Mea putapû mau ia ite i te taatoaraa o te fetii a te Betela i te putuputuraa no te aroha ia ratou. I te mea e ua ite matou e e rave rahi mau pǔpǔ tauturu o tei hamani-ino-hia, ua apee atoa ˈtu matou i to matou mau taeae ma te mau pure tuutuu ore.”

I te 18 no titema, ua itehia i te ohipa i tupu. Ua faaarahia te amaa no Danemata e ua tapae te mau pereoo ma te peapea ore i Lvov, i Ukraine. Ua fanaˈo te mau taeae no Ukraine i te tauturu. Ua topa roa to ratou hau i to ratou tuuraa mai i raro e 1 100 afata rahi, e 20 kilo—tei roto ïa te iˈo, te faraoa ota, te raiti, te tihota e te tahi atu mau maa! Ua uta ˈtu te mau pereoo tau 22 tane taoˈa. Te papai ra te amaa no Danemata: “Te oaoa rahi nei matou, e te haamauruuru nei matou ia Iehova no to ˈna paruru e no te pûpûraa mai i te ravea no te horoa i te rima tauturu.”

Ua faaineine-atoa-hia e hapono atu i te ahu. Te faaite ra te amaa e i roto atoa i teie tuhaa, “ua hau roa te pahonoraa a te mau amuiraa.” Oia mau, ‘te haamaitai nei Iehova i to ˈna mau taata no te mau huru horoaraa atoa.’ (Korinetia 2, 9:11) I to ratou aˈe pae, te fanaˈo nei ratou i te oaoa hohonu no roto mai i te horoaraa ma te faaherehere ore na to ratou mau taeae e mau tuahine. Ua riro te here o ta ratou e faaite ra ei tapao faaiteraa e e pǐpǐ ratou na Iesu. (Ioane 13:35) Mea varavara hoi teie huru here i roto i teie nei ao e fifihia ra.