E ere noa i te pou o te huti i te ara-maite-raa

E huti te mau pou no Kaisara i te pae Miti Mediteranea, te hoê vahi tapaeraa pahi tahito i te pae miti no Iseraela, i te ara-maite-raa o te mau ratere. Na Heroda Rahi i patu i teie uahu e ua horoa ˈtura oia i te iˈoa o teie oire ei faahanahanaraa ia Kaisara Auguseto.

Na te feia ihipǎpǎ i heru mai i te rahiraa o te oire, e tae noa ˈtu te vahi apooraa rahi. Ua haere atoa ratou i raro i te pape no te ite e mea nafea te faanahoraa o te uahu i te paturaa na nia i te hiti one.

Ua faataa te vea The New York Times (8 no tenuare 1991) i te iteraahia mai te mau pou i roto i te mau vahi paparari o te hoê aorai o tei haere roa ˈtu i mutaa ihora i roto i te miti. Mea taa ê roa teie mau pou no te mea te faahiti ra te mau papai i nia iho i te iˈoa o te tahi mau tavana roma o tei ore i itehia na mua ˈtu. Te faahiti-atoa-hia ra te “faaherehere” o te mau pahi, te reira hoi “te papai matamua o tei ore i itehia aˈenei o tei taaihia i te uahu.”

Ua ite te feia haapii bibilia e ua fano atu te aposetolo Paulo i taua uahu ra i te hopearaa o ta ˈna e piti tere mitionare. Ua faaea ˈtura oia i reira e o Philipa te poro evanelia, e ua faaitoito mau â te mau ohipa o ta ˈna i farerei i te mau pǐpǐ. (Ohipa 18:21, 22; 21:7, 8, 16) E nehenehe tatou e taio e rave rahi o taua mau aamu anaanatae mau ra i roto i te buka a te Bibilia, Te Ohipa a te mau Aposetolo ra.

No reira, e ere noa teie mau pou na te pae miti i te tahi toetoea tahito faufaa ore. Te faahaamanaˈo ra ratou i te mau kerisetiano i to ratou mau taeae no tahito ra, o tei poro i te parau apî maitai ma te itoito i roto i te mau uahu e i rapaeau atu “e tae roa ˈtu i te hopea o te fenua ra.”—Ohipa 1:8.

[Faaiteraa i te fatu o te hohoˈa i te api 32]

Garo Nalbandian