“Te puai tei hau aˈe i te puai taata nei”

EAHA te faito mauiui ta te hoê kerisetiano e nehenehe e faaoromai? I teie mahana, te faaruru nei te mau kerisetiano na te ao nei i te veve, te amahamaharaa o te utuafare, te mauiui i te pae no te mau manaˈo hohonu, te maˈi, te tamaˈi, e te hamani-ino-raa. E nehenehe anei e manaˈo e e tapea ratou i to ratou haapao maitai noa ˈtu teie mau mea atoa? Ua parau te aposetolo Paulo e e nehenehe. Ua papai oia e: “E tia ia ˈu te mau mea atoa nei [ia ˈna], tei tauturu mai ia ˈu ra.”—Philipi 4:13.

Ua faaite te Aamu e e navai te puai no ǒ mai ia Iehova no te mau mea atoa. Ei hiˈoraa, i raro aˈe i te faatereraa Nazi i Helemani, ua faaoromai te mau Ite no Iehova i te hamani-ino-raa uˈana. Ua faaruru anei ratou? Te na ô ra te buka Te feia haapii Bibilia e te faatereraa nazi (farani) e: “Noa ˈtu te mau tupairaa atoa, te mau haamǎtaˈuraa, e te mau opaniraa, noa ˈtu te faahaehaaraa i mua i te taata, te tuuraahia i roto i te mau fare auri e te tapearaa i roto i te mau aua haavîraa, aita roa ˈtu te Feia haapii bibilia [te mau Ite no Iehova] i vaiiho ia ratou ia ‘fati.’”

I roto i te mau aua haavîraa, ua tapaohia te mau Ite no Iehova e te mau hohoˈa e toru poro vareau i nia i to ratou rima ahu e ua faataa-ê-hia ratou no te mau haamauiuiraa taa ê. Ua fati anei ratou? Ua tapao te taata maimi i te pae no te feruriraa o Bruno Bettelheim e “aita noa ratou i faaite i te haerea teitei i te pae no te tura taata nei e te tiaraa morare, e au atoa râ e ua paruruhia ratou i te mau tamataraa i roto i te aua o tei vavahi roa i muri aˈe i te mau taata o tei faarirohia ei feia o tei faaau maitai ia ratou, ia au i te manaˈo o to ˈu mau hoa tuatapapa feruriraa e o vau iho nei.”

Oia mau, ‘e puai to ratou no te mau mea atoa nei.’ No te aha? No te mea ua turui atu ratou i nia ia Iehova. Ua parau o Paulo e: “Te farii nei râ matou i taua taoˈa nei i te farii repo nei, ia riro te mana rahi maitai ra i te Atua, eiaha ia matou.” (Korinetia 2, 4:7) Mai te peu e e tia ia outou ia faaruru i te hoê tamataraa, a tiaoro ia Iehova ia noaa mai te tauturu. Faaitoitohia e te puai tei hau aˈe i te puai taata nei o ta ˈna e horoa mai, e manuïa outou i te faaoromai.—Luka 11:13.