Ua matara mai te mau otaro hopea o te Miti Pohe

I TE avaˈe setepa i mairi aˈenei, ua matara te fifi a te feia tuatapapa parau, tei vai noa e rave rahi ahuru matahiti te maoro. Ua manaˈohia e ua hope te aimârôraa i rotopu i te feia tuatapapa i te mau Otaro o te Miti Pohe, noa ˈtu e ua tupu te hoê aimârôraa apî.

Ua itehia mai te mau Otaro o te Miti Pohe i roto i te tahi mau ana i te matahiti 1947 e i te mau matahiti i muri iho. E faufaa rahi to ratou no te faaite i te papuraa mau o te mau Papai Hebera e no te haamaramarama mai no nia i te mau huru tupuraa i te pae faaroo i Paletetina i to Iesu parahiraa mai i nia i te fenua nei. (Isaia 40:8) A nenei-oioi-hia ˈi vetahi o te mau papai, i te matahiti 1991, aitâ fatata te taatoaraa o na papai e 400 i piahia ˈtura e i noaa mai i te rahiraa o te feia ite. E rave rahi o tei manaˈo mai te orometua haapii ra o Ben Zion Wacholder, o tei “inoino roa i te manaˈoraa e ia hiˈohia te taereraa o te neneiraa, e pohe paatoa ïa tatou hou e matara mai ai te taatoaraa o te mau papai o te Miti Pohe i mua i te ao nei.”

Ua taui râ teie huru tupuraa i te avaˈe setepa i mairi aˈenei. A tahi, ua faaite te orometua haapii o Wacholder e to ˈna hoa, o Martin Abegg, e ua faaohipa raua ma te aravihi i te hoê matini roro uira no te papai i te hoê hohoˈa o te mau papai e faaherehere-maite-hia ra. I reira, ua faaite te Fare vairaa buka Huntington i San Marino, Kalifonia, Fenua Marite, e te vai ra ta ratou te mau hohoˈa o te mau papai tahito e e nehenehe e noaa i te feia tuatapapa rahi ma te opani-ore-hia. Inaha, ua patahia te tahi mau hohoˈa o te mau otaro no te faaherehere ia ratou. Ua vaiihohia te mau pueraa hohoˈa i te mau vahi taa ê, e ua tapae mai hoê i te Fare vairaa buka Huntington.

Ua faariro te hoê taata ite i teie tauiraa mai ‘te ohipa i te pae no te tuatapaparaa e nehenehe e faaauhia i te toparaa o te Patu no Berlin.’ No te feia nenei maitihia, ua riro te piaraa i te papai a te matini roro uira e te matararaa o te mau hohoˈa ei ‘ohipa eiâ.’ E uˈana noâ te tatamaˈiraa no nia i te mau tiaraa e rave rahi â matahiti. I roto i taua area taime ra, e au ra e e rave rahi feia ite ê atu o te nehenehe e hiˈopoa i te taatoaraa o te mau Otaro o te Miti Pohe.

[Hohoˈa i te api 32]

Hohoˈa o te hoê tatararaa no nia ia Habakuka, hoê o te mau Otaro o te Miti Pohe