‘Te korona e te ture’
“UA ARATAI maira [o Iehoiada, te tahuˈa] i te tamaiti o te arii ra, e ua tuu i te korona i nia ia ˈna, e ua tuu atoa ˈtu i te ture: ua faaarii aˈera ratou ia ˈna, e ua faatahinu ia ˈna.” (Te mau Arii 2, 11:12). Mea na reira to te buka a te mau Arii faataaraa i te faakoronaraahia te arii Ioasa. Ua tapao anei outou e taa ê atu i te “korona,” aore ra te taupoo a te arii, ua tuu atoa ˈtu o Iehoiada i “te ture” i nia i te arii apî? Eaha “te ture” e faahitihia ra i ǒ nei? E no te aha oia e faaohipahia ˈi i roto i te oroa faakoronaraa?
E tano te parau hebera i hurihia na roto i te parau ra “ture” i na Ture Ahuru aore ra i te Ture a te Atua i roto i to ˈna taatoaraa (Exodo 31:18; Salamo 78:5). Ia au i teie manaˈo, te na ô ra te aamu hoê â huru faatiaraa e vai ra i roto i te Paraleipomeno 2, 23:11 ia au i te tatararaa a La Bible de Jérusalem (neneiraa 1955) e: “Ua arataihia maira te tamaiti o te arii, ua tuuhia ˈtura te korona e te Ture i nia ia ˈna, ua faaariihia ˈtura oia.” Teie râ, te mono nei teie tatararaa i te parau “te ture” na roto i te parau ra “te mau fifi rima” i roto i te irava o Te mau Arii 2, 11:12, area i roto i te papai hebera ra, hoê â parau tei papaihia i roto i na irava toopiti. No te aha?
Te faataa ra te hoê tatararaa parau bibilia tuiroo helemani, Herders Bibelkommentar, e mea fifi roa na vetahi feia iriti ia manaˈo e e nehenehe ta te arii e tuu i te Ture i nia i to ˈna upoo aore ra i nia i to ˈna rima. I te mea e i roto i te Samuela 2, 1:10, te faahitihia ra te mau poe e tuuhia i nia i te rima taa ê atu i te korona a te arii Saula, ua faaoti aˈera ratou e i roto i Te mau Arii 2, 11:12, e taiohia na te irava i te omuaraa mai teie te huru, “te korona e te mau fifi rima”. Teie râ, mea papu ore roa teie faaotiraa. Te monoraa i “te ture” na roto i te parau ra “fifi rima,” o te hoê ïa tauiraa tei atea roa i te papai.
No reira, te faahoˈi ra te neneiraa o te matahiti 1978 a te tatararaa La Bible de Jérusalem i te manaˈo no te Ture aore ra te faufaa o te Ture na roto i te huriraa i teie vahi mai teie te huru: “e ua horoahia ˈtura te papai o te faufaa.” Ua horoa mau râ anei o Iehoiada i “te ture” ia Ioasa? Parau mau, e nehenehe atoa e huri i te parau haa hebera i tatarahia na roto i te parau “ua tuu atu [oia]” na roto i te parau “ua horoa ˈtu [oia]”. Teie râ, i roto i te buka a Te mau Arii e tae noa ˈtu i te Paraleipomeno, hoê noa taime te papairaahia teie parau haa i roto i te irava e e tano oia i te hoê â taime no te korona e te ture. Hau atu, i muri noa ˈˈe i te parau haa, te vai ra te parau hebera “i nia ia ˈna.” Inaha, ua tano ïa te tatararaa ‘ua tuu atu i nia ia ˈna.’ Mai ta te Tatararaa a te ao apî e faaite ra, ua ‘tuuhia ˈtu’ te korona e te ture ‘i nia’ i te arii apî o Ioasa.
No te aha ïa te tahuˈa rahi i ‘tuu’ atu ai i te ture i nia i te arii apî, e mea nafea to ˈna raveraa? Teie ta te taata tatara bibilia helemani o Otto Thenius i parau: “Te Ture, te buka tei roto te mau ture a Mose. Ia oti anaˈe te arii i te faakoronahia, e tapeahia na teie buka i nia i to ˈna upoo ei taipe.” (Die Bücher der Könige). Hoê â manaˈo to te orometua haapii ra o Ernst Bertheau e te na ô ra oia e: “Ia tuuhia ˈtu te Ture [i nia i te arii], e auraa taipe ïa to teie ohipa: oia hoi, e titauhia te arii ia faatere ia au maite i te ture.” — Die Bücher der Chronik.
Ua faaue te Atua e ia papai te arii tataitahi e parahi atu i nia i te terono i te Ture na ˈna i roto i te hoê buka, ia nehenehe oia e tuatapapa e e faaohipa i te ture i roto i to ˈna oraraa taatoa (Deuteronomi 17:18-20). Te peu no te tuuraa ˈtu i “te ture” i nia i te arii apî, e ravehia ïa no te faahaamanaˈo ia ˈna na roto i teie ohipa iti taipe e, noa ˈtu e o ˈna te arii, eita ta ˈna e nehenehe e na nia ˈtu i te Ture a Iehova. I muri aˈe i te pohe o Iehoiada, ua moehia râ ia Ioasa teie faaueraa faufaa roa e ua faarue mǎrû noa ˈtura oia i te haamoriraa a Iehova. I te pae hopea, ua taparahihia ˈtura oia. — Paraleipomeno 2, 24:17-25.