Te tamau noa nei te mau hamani-ino-raa i te fenua Burundi
I TE omuaraa o te matahiti 1989, ua faatupu te feia faatere o te fenua Burundi, fenua no Afirika no ropu, i te hoê hamani-ino-raa rahi i nia i te mau Ite no Iehova. Mai ta Te Pare Tiairaa i parau i roto i ta ˈna neneiraa no te 1 no novema 1989, ua tamata te mau mana faatere i te faahepo i te mau Ite ia faarue i to ratou faaroo. Ua haapeapeahia ratou, ua tapeahia ratou, ua taparahihia ratou e ua roo-atoa-hia ratou i te tahi mau huru raveraa etaeta. Eaha ˈtura ïa te huru tupuraa mai taua mahana ra?
Te faaite nei te tahi atu faahitiraa parau no te fenua Burundi e, a haere mai ai te tiaau mataeinaa i Kinyinya e i Gitega, ua tamata te mana faatere i te haru i te mau melo o te amuiraa i te hoê putuputuraa. Ua nehenehe te tiaau mataeinaa e te tiaau haaati i te horo ê, ua tapeahia râ te tahi pae, e e piti tamarii no te haapiiraa tuarua e hoê tamahine iti no te haapiiraa tuatahi i roto. Ua taparahihia ratou paatoa. Te mahana i muri iho, ua haere te mau Ite o tei tapeahia i mua i te tavana rahi e ua faataa aˈera ratou e no te aha ratou e ore ai e faaô i roto i te hoê pǔpǔ politita. Ua taparahi-faahou-hia ratou. Te faaite nei te tahi atu â mau faahitiraa parau i te mau tupuraa mai te reira te huru.
Ua papai te hoê kerisetiano e matahiapo hoi i roto i te hoê amuiraa no te fenua Burundi e: “Aita hoê noa ˈˈe Ite no Iehova i tapeahia no te hoê eiâraa, no te hoê taparahiraa taata aore ra no te hoê totovaraa. Mai te peu e te vai ra ta te mana faatere i te tahi mau faahaparaa i te mau Ite, ia haere ïa ratou i mua i te mau tiribuna i mua i te taatoaraa, maoti i te hamani ino atu i te feia e ora ra i roto i taua fenua ra ma te hau, i te auauraa ˈtu ia ratou mai te mau animala taehae e i te haruraa i ta ratou mau faufaa. Ua turaihia e rave rahi mau taeae no te fenua ia horo ê e ia ora mai te mau taata aita e faaearaa. Ua tamata te hoê vahine kerisetiano, ua tapeahia hoi ta ˈna tane, i te haere e farerei e rave rahi mau mana faatere no te faaora mai ia ˈna. I te mau vahi atoa, aita ta ˈna mau aniraa i fariihia. Ua pahonohia e ‘eita ta ˈna tane e faaorahia mai te peu e farii noa te mau Ite no Iehova i te moni no te mau fenua ěê no te faaaueue i te fenua’. Auê hoi i te haavare e!”
Te vai ra râ te mau parau apî maitai no te fenua Burundi mai: aita te mau Ite e vaiiho ra e ia faariariahia ratou. Ma te haapao maitai, e ma te papu râ, te faatupuhia nei te pororaa i te parau apî maitai, e te ite nei to tatou mau taeae e to tatou mau tuahine e, na roto i te hoê tiaturiraa rahi i nia ia Iehova, e nehenehe ta ratou e faaoromai. E rave rahi mau rata e faaite ra i te inoino tei hapono-aˈena-hia i te fenua Burundi e, ma te papu maitai, e rave rahi â te tae mai ia ite anaˈe te ao e, te tamau noa nei te fenua Burundi i ta ˈna ohipa hamani-ino-raa aroha ore i nia i te mau Ite no Iehova.
[Tumu parau tarenihia i te api 8]
Teie te vahi nohoraa o te peretiteni no te fenua Burundi:
His Excellency Major Pierre Buyoya
President of the Republic of Burundi
Bujumbura
REPUBLIC OF BURUNDI