Iesu, to ˈna oraraa e ta ˈna taviniraa

Ua erehia anei Ioane i te faaroo?

UA MATAHITI i teie nei to Ioane Bapetizo vairaa i roto i te fare tapearaa, e ua faaroo oia e ua faatia aˈera o Iesu mai roto mai i te pohe i te tamaiti a te vahine ivi no Naina. Teie nei râ, te hinaaro nei oia e na Iesu iho e haapapu mai i te auraa o taua semeio ra; no reira, tono atura o ˈna e piti o ta ˈna mau pǐpǐ no te ani atu ia ˈna e: “O oe anei tei tae mai? E tiai atu anei tatou ia vetahi ê?”

E riro taua uiraa ra i te mea huru ê inaha hoi, a bapetizo atu ai oia ia Iesu fatata e piti matahiti na mua ˈtu, ua ite o Ioane i te varua o te Atua i te pauraa mai i nia ia ˈna e ua faaroo oia i te reo o te Atua i te fariiraa mai ia ˈna. Te turai nei paha te uiraa a Ioane ia vetahi pae ia manaˈo e ua toaruaru to ˈna faaroo. Aita roa ˈtu hoi. Eita paha ïa o Iesu e faahiti i te parau maitai no Ioane, ta ˈna hoi i rave i taua taime ra, mai te peu e ua feaa to ˈna manaˈo. No te aha o Ioane i ui ai i taua uiraa ra?

Peneiaˈe te hinaaro ra oia e ia haapapu o Iesu e o ˈna iho te Mesia. E faaitoito ïa te reira ia Ioane o te faaea noa ra i roto i te fare tapearaa. Mai te huru râ ïa e te vai ra te tahi mau tumu ê atu â e ui ai oia i taua uiraa ra. Te mea papu, te hinaaro nei oia e ite e mai te peu e e haere faahou mai anei te tahi, te hoê mono paha o te faaoti i te taatoaraa o te mau parau tohu ta te Mesia e tia ia faatupu.

Ia au i te mau parau tohu a te Bibilia, ta Ioane hoi i ite maitai, e arii te Faatavai a te Atua, te hoê faaora. Teie râ, tei roto noâ o Ioane i te fare tapearaa, tau avae i muri aˈe i te bapetizoraa o Iesu. Mea maramarama ˈtura ïa te aniraa a Ioane e: ‘O oe anei te haamau papu i te Basileia o te Atua, aore ra e tia anei ia matou ia tiai i te tahi atu, i te hoê mono, ia faatupu oia i te mau parau tohu atoa no nia i te hanahana o te Mesia?’

Maoti i te pahono i te mau pǐpǐ a Ioane e: ‘Oia mau, o vau te haere mai!’, ua haapapu Iesu i te reira i taua iho â taime ra, ma te faahiahia hoi, na roto i te faaoraraa e rave rahi taata i te mau maˈi huru rau. I muri iho, faaue atura oia e: “A haere, a parau atu ia Ioane i ta orua i faaroo e ta orua i ite iho nei; e te roaa nei te ite i te matapo, te haere nei te pirioi, te tamâhia nei te lepera, te faaroo nei te turi, te faatiahia nei te pohe, e te parauhia nei te evanelia i te taata rii. E o te ore e mahea ˈtu ia ˈu nei e ao to ˈna.”

Oia mau, i te mea hoi e e nehenehe e manaˈo na roto i te uiraa a Ioane e e rave o Iesu hau atu â, na roto paha i te faaoraraa ia ˈna, te aˈo nei Iesu ia Ioane e, eiaha oia e tiai hau atu i taua mau tapao ra.

Ia reva ˈtu te mau pǐpǐ a Ioane, huri tia ê aˈera o Iesu i nia iho i te tiaa rahi taata e faaite atura ia ratou e o Ioane te “vea” a Iehova i faahiti-atea-hia i roto i te Malaki 3:1 e oia atoa te peropheta Elia i faahiti-atea-atoa-hia i roto i te Malaki 4:5, 6. Mea na reira ˈtura ïa to ˈna haafaahiahiaraa ia Ioane, ma te tuu atu ia ˈna i nia i te hoê â tiaraa e te mau peropheta o tei ora na na mua ˈtu ia ˈna, mai ta ta ˈna mau parau e haapapu ra:

“E faaite atu hoi au ia outou, I ta te vahine e fanau nei, aita ˈtu ïa e peropheta rahi ia Ioane Bapetizo nei; o tei iti roa râ i te basileia o te Atua ra, e rahi ïa ia ˈna. Ua faatia anaˈe te taata, e te mau telona atoa i faaroo ia Ioane ra, i te Atua, o ratou i bapetizohia i te bapetizoraa na Ioane.”

Te faaite nei Iesu i ǒ nei e eita o Ioane e ô i roto i te Basileia o te raˈi, no te mea o tei iti roa ra i te Basileia o te Atua ra, e rahi aˈe ïa ia ˈna. Ua faaineine o Ioane i te eˈa no Iesu, e pohe râ oia na mua ˈˈe te Mesia e faaau atu ai e ta ˈna mau pǐpǐ i te hoê faufaa, aore ra faaauraa parau, ia nehenehe ratou e faatere atu ei arii e o ˈna i roto i to ˈna Basileia. Te tumu ïa te reira Iesu e haapapu ai eita o Ioane e ô i roto i te Basileia o te raˈi. E riro râ oia ei melo i nia i te fenua nei i raro aˈe i te Basileia o te Atua. Luka 7:18-30; Mataio 11:2-15.

◆ No te aha Ioane e ani atu ai ia Iesu e O oe anei tei tae mai aore ra e tiai anei matou ia vetahi ê?

◆ Ia au i te parau a Iesu, eaha te mau parau tohu ta Ioane i faatupu?

◆ No te aha o Ioane Bapetizo e ore ai e ora i nia i te raˈi e o Iesu?